Cu urgencia a pidi presencia di ambulance pa un accidente hopi serio cu a tuma luga riba Green Corridor, entre dos rotonde. Ta trata di e caminda di Sero Teishi entre Rotonde di Mahuma cu Rotonde di Sero Teishi
A mobilisa polis mesora pa e sitio pa asina cera e caminda di biaha y desvia cualkier trafico e direccion ey. Na sitio a bin topa cu un vehiculo boca abou y varios persona herida.
E vehiculo envolvi tabata un Kia Sportage color shinishi (A-4530) cu a bolter y laga varios persona den situacion delicado. Un total di tres ambulance mester a presenta pa asina transporta e heridonan pa hospital.
Pa logra saca e heridonan for di e situacion cu nan tabata aden, mester a recuri na yudansa di Brandweer cu e haci uzo di nan materiaalwagen pa asina kibra y saca tur hende for di e auto.
Te na e momento aki no tin informacion di kico lo por a tuma luga cu a ocasiona e accidente aki, pero locual cu ta sigur cu Sero Teishi ta conoci pa un sitio misterioso caminda hopi accidente serio a tuma luga sin nunca por a saca afo kico a pasa.
