Un total di 125 empleado di Tropical Bottling Company a uni forsa awe mainta pa haci e area di Grapefield Beach limpi. E accion aki ta en conexion cu observacion di dia mundial di Coastal Clean Up of como tambe World Beach Clean Up Day.
Esaki ta un iniciativa di Coca Cola, un programa yama “World Without Waste”. Riba e T-shirt di e empleadonan por lesa #somosaliados cu ta un slogan cu ta uni Coca Cola Aruba cu e resto di region di Latino America y Caribe.
Pa mas o menos 6:00 am ya caba e empleadonan di Tropical Bottling Company a cuminsa recoge sushi riba e beach, cu ta bini primordialmente for di lama. A cubri un area total di mas o menos 2.5 km.
Mas despues lo informa di e cantidad total di sushi colecta durante e mainta. Asina Tropical Bottling Company, agente pa hopi decada caba di e producto Coca Cola, ta demostra su compromiso serio como un bon ciudadano corporativo. Tropical Bottling ta resorta bou di MetaCorp, estableci desde aña 1920, e compania Rubiano cu mas aña di existencia continuo riba nos isla.
