Durante dos dia a trata y aproba ley “normering topinkomens”, esta e e ley di normanan pa cu entradanan di funcionarionan den top di entidadnan gubernamental, semi-gubernamental y fundacionan. Fraccion di AVP a vota contra.
E ley aki ta resultado di entrega di autonomia di Evelyn Wever-Croes na Hulanda. Evelyn mes a trece padilanti y a palabra cu Hulanda cu lo aproba e ley aki cu lo bin na vigor per 1 d juli di e aña aki.
Bou di e ley ta resorta 90 entidad, entre otro WEB NV, ELMAR, SETAR, Centrale Bank, APHA, ATA, aeropuerto, SVb, ImSan, AZV, Stichting Ziekenhuisverpleging, FCCA, Serlimar, Parke Nacional, Universidad, otro entidad di enseñansa, SABA, Cas Marie, Centro Kibrahacha, Sociale Zaken, e fundacionnan social y cultural.
E ley a drenta Staten dia 3 di november 2021. A reuni cu porta cera cu diferente entidad pa nan opinion encuanto e ley aki. Entre otro a reuni cu WEB NV, Elmar, SETAR NV, sindicato, AirPort, Centrale Bank y APHA.
Segun esunnan cu a scucha e ley lo afecta no solamente salarionan halto, sino alabes esunnan cu tin un salario mas abou. No ta cla unda e placa cu resta lo bay. Ta anticipa cu e ley lo afecta e “loongebouw” di e entidadnan, esta tur salarionan di henter e compania. Ta anticipa un “trickledown” effect, dor di cual esunnan cu tin menos salario tambe lo sinti e efecto den nan entrada mensual. A expresa preocupacion pa loke ta trata e personanan cu ta specialista den un of otro tereno cu no lo ta atrai mas pa bin traha na e companianan cu no lo por ofrece nan un salario y beneficio atractivo. E falta di balor pa nos expertonan lo ocasiona un “braindrain”. Esta cu nos expertonan lo bandona nos pais pa bay traha den exterior cu salarionan y condicionnan di trabou mas atractivo. E ley aki lo por afecta alabes concurencia di e entidadnan riba mercado y ta necesario pa nan tin expertonan cu por garantisa nan posicion competitivo.
Wyatt-Ras ta trece padilanti cu den un nota di cambio fecha dia 20 di juni 2022, gobierno ta amplia e entidadnan cu ta cay bou dominio di e ley den articulo 2 inciso 1, parti d. Aki ta agrega Fundacion Salud Mental Aruba, Respaldo. E motibonan den e splicacion di e ley ta cu e fundacion aki ta haya entrada via di AZV y cu un di e miembronan di Raad van Toezicht di e fundacion ta tuma luga bou encargo di e ministerio di Salubridad. Esaki mientras den articulo 4 di e ley ta indica cu e Ley no ta aplica pa funcionarionan top manera dokter, dentista, boticario. Aki segun Wyatt-Ras por mira en bes cu e gobierno aki sostene salud mental, mirando e diferente problemanan cu ta ser señala manera depresion, angustia y otro problemanan psicosocial y cantidad di casonan ta mas halto y creciendo, por mira cu no tin suficiente atencion pa salud mental dor di e gobierno aki.
Wyatt-Ras a puntra minister dicon toch ta pone Respaldo den e ley? Ya cu ta dificil pa haya e profesionalnan medico of psychiater pa traha lo haci esaki mas dificil ainda.
Wyatt-Ras a menciona cu Raad van Advies ta cuestiona cu gobierno no a haci investigacion den entidad pa averigua te con leu y den cual grado e problematica di salarionan halto ta? Raad ta indica cu no ta splica den memorie van toelichting e embergadura di e problematica y definicion di e problema.
Den su contesta gobierno ta admiti cu e comision di Corporate Governance a licht door e entradanan halto den forma limita. A haci solamente un “quick scan”. Ta trata 90 entidad sinembargo no a investiga tur.
Solamente 14 entidad semi-gubernamental a ser acerca pa duna informacion encuanto entrada bruto di aña. Wyatt-Ras ta pidi minister pa Staten ricibi e rapportnan?
Mirando tur consecuencia cu entidadnan cu a papia cu Staten ta trece padilanti lo tabata miho pa haci miho investigacion prome cu presenta e ley aki.
E hecho cu gobierno no kier contesta Raad van Advies encuanto e neveneffecten y trickled down pa salario di otro empleadonan ta mustra riba cobardia segun Wyatt-Ras. Bo kier introduci un ley cu tur hende ta bisa cu lo tin efecto pa esunnan mas humilde y bo no kier investiga of contesta riba esaki. Evelyn Wever-Croes ta djis menciona contesta cu e ley no ta trata e salarionan mas abou. Den un otro contesta e ta admiti cu lo tin un trickle down effect.
E minister presidente tampoco no ta mira braindrain un posibilidad paso segun e ainda e salarionan lo keda halto. Wyatt-Ras ta puntra e ora dicon tin dokternan y specialistanan ta bandona nos isla ora a tuma medida den cuido y nan mester a entrega?
Por constata tambe cu e ley aki no lo tin consecuencia pa oficina di abogadonan y accountants priva cu ta duna servicio na gobierno, kiermen gastonan di friend and family lo keda halto pa gobierno.
Raad van Advies ta indica cu den articulo 10 inciso 1 e bezoldiging of salario di un topfunctionaris cu ta e norma pa maximalisacion ta 261.000 pa aña pero ta trece dilanti cu e bezoldigings norm di e minister presidente ta mas halto ora conta tur otro vergoedingen auto, representatie cu ministro presidentiële tin. Wyatt-Ras ta haya cu no ta na su lugar pa pasa un ley sin cu e norma ta cla.
Segun Wyatt-Ras ta lastima cu kier baha salarionan y limita entrada di e ciudadanonan cu ta yuda carga nos economia y di e forma aki baha e poder di compra di nos ciudadanonan mas ainda. Esaki segun Evelyn Wever-Croes ta palabracion entre Hulanda y Aruba pa aproba e ley di LNT prome cu gobierno por paga e 5% na ambtenaarnan. Aki e ta ganja paso ta e mes ta pone esaki como condicion pa tene tur ambtenaar keto. Den forma di sinofono. Aki por nota cu Wever-Croes ta sconde atrobe tras di saya di Hulanda.
Con Evelyn por declara de conferencia di prensa ayera cu e ta orguyoso di su Wever-Croes norm y cu e ley lo perhudica solamente 10 persona? Con e por inventa un mentira di e forma aki?
Di e forma aki lo ta baha mas e poder di compra di nos ciudadanonan y hinca nos mas den pobresa pa e keda na mando. Ya nos pueblo no por mas. Prijs di gasolin, awa, coriente, vivienda, comestibel, pan, webo ta sigui subi. Kier haci nos hendenan mas pober a la Chavez y Maduro.
Di otro banda gobierno no ta baha su gastonan di goederen en diensten. Ainda tin nombramento continuo di friends and family. Segun Raad van Advies y CFT gastonan ta bira masha halto di abogado, huur di e edificionan, di personal entre nan friends and family, sin papia di auto caro cu e minister di financiën a lease y fiestanan di ministernan. Pues kier haci pober parti di nos comunidad pa enrikece e ministro presidente cu su topinkomen y tur su friends and family.
