Ronella Croes ta CEO di Aruba Tourism Autority. Nan a probecha di e mision comercial di Aruba pa Bogota pa haci un evento n’e residencia oficial di embahador di Reino Hulandes. Esaki ta relaciona cu e 40 aña di ATA Latino America na Colombia. Durante un encuentro cu Ronella Croes, el a splica cu nan a colabora y ta parti di e programa den e mision pa Colombia. Asina tur hende por haya un bista di e mercado. Cuarenta aña di ATA Latino America na Colombia ta un refleho pa e socionan na Colombia, segun Ronella Croes. E ta un muestra cu e compromiso cu Aruba tin den tempo bon y tempo malo.
No semper e cosnan tabata facil y nunca e ta tampoco. Ronella Croes, CEO di ATA a splica cu mester corda cu den pasado esunnan cu tabata sali for di e mercado di Colombia mester a aplica pa un visa. Riba esaki den pasado a coopera cu autoridadnan pa elimina e visa y a logra tambe, Ronella Croes a indica. Asina a habri un otro etapa pa e mercado di Latino America. Colombia ta e mercado primario pa Aruba ora cu ta papia di Latino America. Ora pone den contexto y wak historia di Latino America pa Aruba, desde 1980 pa december 2022, Aruba a ricibi mas cu 27 miyon for di e region di Latino America.
E ta keda un parti integral di strategia di Aruba pensando asina riba diversificacion, segun CEO di ATA. E aña aki nan a logra cu British Airways cu ta di mercado Europeo y a anuncia tambe cu Latam lo cuminsa duna servicio aereo entrante december 2023. Esaki ta algo cu nan a traha hopi largo riba dje hunto cu aeropuerto y oficina di turismo. E ta un hub cu tabata falta di Latino America. Bogota ta un hub for di Colombia y otro mercadonan di Latino America. Ronella Croes a splica cu nos tin e hub di Copa for di Panama y awo Latam for di Lima, Peru. Cu e hub di Peru por trece e mercado di Argentina, Brazil, Chile y Peru mes. ATA ta hopi contento di por a anuncia esaki, Ronella Croes a finalisa bisando.
