Ernst Noorman ta Embahador di Reino Hulandes pa Colombia. Un di e temanan cu tambe a atende den e mision ta e importacion di carni for di Colombia pa Aruba. Aruba ta haci dificil pa carni di Colombia drenta Aruba. Ernst Noorman cu ta Embahador di Reino Hulandes a splica cu e ta un tema cu ta anda algun tempo caba. Aruba kier importa pero Aruba mes ta pone reglanan estricto. Corsou ta importa carni for di Colombia. Nos redaccion tin informacion cu na Boneiro tambe ta importa carni di Colombia.
Ta Aruba so tin reglanan estricto. Embahador di Reino Hulandes a splica cu Aruba tambe por pero ta depende e restriccionnan cu tin di Aruba mes. Pa importa bon carni di Colombia mester scoge e bon matadero. Haci un inspeccion cu bo inspectornan di carni di Aruba y habri e posibilidad di importa carni for di Colombia di bon y calidad halto.
Na Aruba ta e Ministerio di Salud ta esun cu ta stroba e importacion di carni pasobra nan preocupacion ta e calidad di carni. Corsou no tin tur e restriccionnan aki y cu ta haci posibel pa e carni di Colombia por drenta. Ernst Noorman mes ta kere cu riba un aspecto di siguridad por importa e carni di Colombia pa Aruba. Bo mester conoce bon esun cu ta bende bo e carni na Colombia y di unda e ta procedente. Mester mantene un bon relacion y haci inspeccion regular na e matadero y asina bo sa sigur unda mester bay cu e importacion di carni. Haci tur cos cu e siguridad necesario ta loke Ernst Noorman a bisa finalmente.
