E situacion tenso entre Gobierno di Aruba y esun di Hulanda riba e forma con ta atende cu e prestamo pa Aruba, tin intencion di politica na Aruba. Expresion manera “Hulanda ta abusado” of cu ta practica colonialismo, no a cay den bon tera na Hulanda.
Oposicion na Aruba ta haya tambe cu e actitud aki di e parti geel, cu ta mayoria den e coalicion, no ta esun miho. “MEP a haci robes di bira lomba pa Hulanda,” e lider di e partido mas grandi den oposicion, Mike Eman, a bisa.
“Nos ta lamenta e tono cu nos a scucha Minister Xiomara Maduro uza den direccion di Hulanda y despues a wordo sosteni door di Evelyn Wever Croes.”
Por corda cu e politico tabata na Hulanda practicamente den e mesun periodo cu e prome minister di Aruba. Eynan el a hiba diferente combersacion y reunion politico. A sinti den tur e encuentronan aki un ruptura den e confiansa di Hulanda pa Aruba.
Esaki, e ta kere, ta pa motibo cu diferente biaha e mandatario a firma palabracionnan y despues ta hala atras. “Na Hulanda ta tuma hopi na serio ora cu firma pa haci algo y kier mira cu ta cumpli cu esaki. Mi a expres’e na Hulanda, cu ami no ta facil pa firma algo cu ta mishi cu e espacio di gobernacion di Aruba pero unabes cu a haci un compromiso, semper a cumpli.
Palabra confiansa y credibilidad ta hunga rol y esaki ta afecta ultimamente door di e gobierno aki cu continuamente a prepara un tipo di trampa pa Hulanda. A firma algo pa nan keda contento y despues ta cambie den parlamento. Esaki a afecta e credibilidad di Aruba.”
E lider opositor ta kere cu si trece un cambio den direccion politico na Aruba, e ora Hulanda lo tin oportunidad di un comienso nobo cu Aruba. Su unico meta awor ta pa converti e 900 miyon di debe di Aruba cu Hulanda den un fondo di inversion pa traha scolnan, proyecto pa grandinan y esnan di menos necesidad, combina cu infrastructura y innovacion.
E ta bisa cu no ta pidi pa exonera e debe pero convirtie den un fondo di inversion unda cu Hulanda tambe tin bista riba dje.
