Vocero di fraccion di partido AVP Melvin Tromp.
Polis suspendi y locutora persigui, tur dos a denuncia e caso na prome instante.
Den e conferencia di prensa di fraccion di AVP diahuebs mainta vocero di fraccion Melvin Tromp a sali fuertemente contra lider di fraccion di MEP Rocco Tjon y invitando su persona pa e debate cu realmente e tin cu programa/acepta segun Tromp. E kier sa con Tjon ta bay splica e pueblo den un forma transparente e contenido di e vonnis / sentencia caminda cu Hues a prohibi’e di yega cerca di su propio yiu. Melvin Tromp tambe a invit’e na debate unda cu ta, ki ora cu ta y a pone su mes na disposicion. E apelacion aki ta bay den e mesun factor di transparencia cu Tjon kier hiba pa cu topico di ministerio publico.
E ta bisa cu husticia ta selectivo atachando/ persiguiendo hende, caminda e Minister di husticia ta drumi. Casualidad di bida como ehempel, Leoncita Arends di Canal 90 e tempo ey (persigui incansabelmente) ta e persona cu a entrevista e Mama di e criatura cu Rocco Tjon a keda acusa door di dje. E tabata e prome locutora pa trece e caso dilanti den media y a haya e atencion di e comunidad. E Mama en cuestion a expresa su pensamento/evidencia como tambe e dolor bibando na e momento ey. Mirando cu e caso tabata uno hopi serio, el a capta atencion di mayoria di e pueblo. For di akinan su persona a keda persigui te dia di awe.
Den Cuerpo Policial tambe a persigui hende!
Tin un miembro den Cuerpo Policial cu tabata e persona, cu a base di amistad cu e Mama di e criatura, a bin constata señalnan hopi peligroso y cu tabata mustra cu tin un victima/un mucha menor di edad indicando den direccion di abuso sexual di menor. E Miembro di Cuerpo Policial aki tin aproximadamente 2 aña suspendi door di Cuerpo Policial cu autorisacion di e Minister di Husticia actual Andin Bikker. Netamente y simplemente pasobra e persona aki a bay denuncia Tjon den henter e situacion. Melvin Tromp ta recorda cu nan tambe ta analisa casonan serio y preocupa cu e forma cu Ministerio di Husticia ta habri man pa esnan cu ta comete fechoria y den e caso di Tjon, abuso sexual cu menor di edad. Sin lubida cu Endy Croes tambe ta un di nan, cu mancha scur riba nan cabes pa yega ministerio publico pa bay purba susha nomber cu atakenan cu a formalisa den un rapport cu nan a bay entrega na ministerio publico.
Melvin Tromp a reacciona riba tur e acontecimento cu a tuma luga e ultimo siman di un peticion entrega na ministerio publico door di dos persona cu nan credibilidad ta wordo atacha. El a papia di loke a pasa dia 22 di februari 2018, ora cu e dos personanan aki, Endy Croes y Rocco Tjon como lider di fraccion di partido MEP den Parlamento a haya ta bon pa traha un rapport y entrega un peticion na ministerio publico pa haci un investigacion riba maneho di gobierno anterior relaciona cu otorgamento di tereno. Den e caso aki Ex Minister Benny Sevinger, kende ta unico autorisa pa duna tereno segun e peticion haci na ministerio publico.
E sentimento cu ta biba ta cu ta trata hustamente di personanan cu nan record y/o e forma cu nan credibilidad ta keda cuestiona den comunidad. Ta trata di dos persona cu tin manchanan scur riba nan cabes. Endy croes, un persona cu a participa den un estafa na AZV, cu a participa den un estafa na N.V. Elmar ora cu a para meter tanto na negoshi propio y di su señora, cas di su suegro como tambe varios otro companianan establece na Aruba. Sin laga afo e historia di cual e ta conoci caminda e tin un sentencia di hues caminda a retir’e di trabou cu cero compensacion pa malversacion/mal uzo di poder den e cargo cu e tabata fungi na Lotto pa Deporte.
Rocco Tjon un persona cu a sali for di e departamento di Cuerpo Policial di Aruba, a tuma nota y den un forma hopi serio di su ultimo expresionnan haci, ta mustra e kier back paddle di locual cu ta tumando luga. Haciendo como si fuera no ta esey tabata su intencion!
Ora papel ta scop!
Melvin Tromp di su banda ta mustra cu hechos, cu ta Tjon ta esun cu a bay dia 21 di augustus 2018, un dia prome cu el a aparece hunto e colega di dje na ministerio publico, pa entrega un peticion. Un peticion pa bay over na investigacion y persigui esnan di AVP. Den e mesun rosea dia 21 di augustus ta publica cu nan no ta compronde dicon Hulanda no kier bin/yuda investiga e caso di corupcion. Den e articulo Rocco Tjon ta bisa “despues cu nan a entrega e caso aki na februari na dos siman despues cu a haci un peticion na ministerio publico” tambe ta menciona “siman pasa riba un diahuebs nos a entrega informacionnan nobo adicional cu ta regarda e mesun topico aki”. Cu esey Tromp ta pone enfasis cu no ta su persona pero e propio Tjon a bisa.
Melvin Tromp a menciona tambe cu Rocco Tjon ta insisti riba un debate transparente cu parlamentario/ colega Candelaria y na e manera aki den un forma transparente informa e pueblo corectamente.
Melvin Tromp ta bolbe recorda Rocco Tjon cu ta mas di un aña caba cu e ta wardando riba su persona pa un debate. Pa e por ta transparente conforme e integridad/ credibilidad cu e ta kere cu e tin den e comunidad aki, referiendo na e duda cu tin den e aparato di husticia, cu Parlamentario Tromp ta kere ta hustifica. Tjon a bay haci entrega di e kehonan mientras e ta papiando di imparcialidad, formando parti di partido di MEP cu na varios ocasion ministernan actual, antes den oposicion pa MEP, a bay over na entrega varios keho na ministerio publico y awe den forma hermetico nada no a bin afo di ningun caso cu a bay denuncia. Pues e ta actua contra e imparcialidad cu OM mester tin.
Melvin Tromp y partido AVP ta kere den husticia pero no uno selectivo. Na momento cu desvia, husticia tin e deber di bay busca e informacion pa yega na e conclusion corecto si ta culpabel of no. Pero no por ta asina cu continuamente ta jaag riba hende di partido berde mientras tin denuncianan haci contra te hasta esnan cu ta forma parti di e coalicion actual.
