Megateca Genie a organisa un evento pa duna homenahe y reconoce, como tambe premia Dj local miembro di nan megateca diabierna anochi. Dj Thaii a bay cu un premiacion di Dj mas disciplina di aña 2023. E ta un Dj cu tin algun aña den Genie. Tambe a reconoce un Dj cu tin 15 aña den Genie, kende ta DJ Anthomix.
“Nos kier yama nan danki pasobra no ta facil pa esaki sosode, pero danki na nan cu nan ta cu Genie, y nos t’ey hopi duro ainda pa loke ta trata entretenimento,” segun Edwin Croes, propietario di Megateca Genie.
Pa haya reconocemento, bo mester tin basta aña dunando aporte den Genie. Aña pasa esaki a bay pa DJ J Rick, e aña aki el a bay pa DJ Anthomix tocando 15 aña largo cu Genie haciendo un bon trabao.
Megateca Genie tin 35 aña ta pone ambiente y organisando e evento aki pa reconoce su miembronan. Ora bo haci esaki pa nan, na su turno nan ta haya un motivacion pa nan sigui segun Croes. Esaki sigur ta e caso mirando cu riba pagina di social media di e Dj’s por mira con orguyoso y feliz nan a keda cu e reconocimentonan aki.
Genie ta un di e poconan cu ta haci esaki na Aruba y lo sigui haci’e pasobra haciendo esaki segun Croes sigur lo motiva Dj pa nan sigui. “Mester duna balor tambe pa loke nan ta duna den Genie tambe.”
