Prome minister a convoca un reunion unda cu mayoria di e sindicatonan no a bin, papiando aki di SEPPA, SACA y SPA, kendenan a duna nan motibo. Un sindicato so a presenta, segun mediador Anselmo Pontilius. Asina mes e reunion a continua. Prome minister a splica, e argumentonan cu nan a scucha fo’i parti Hulanda pakico no ainda pais Aruba no tin e libertad pa atende cu e recorte di salario. Esey ta keda e punto principal, segun Pontilius.
E pregunta logico ta si no awo, ki tempo. N’e mesun momento si tin alternativa berdad ainda pa por sigui negosha, teniendo cuenta cu tin por lo menos contra e sindicatonan tin un caso sumario (SEPPA y SIMAR), otro siman. Pero esey no mester stroba e partidonan yega na un acuerdo
Pero tin cu asumi si hues bisa cu ta OK cu por traha menos ora pa siman of pa luna, pasobra ta haya menos salario, con ta bay atende cu ne. Si hues bisa no, tambe mester keda na mesa. E punto principal ta cu e empleadonan publico ta bisando pa no sigui kita 12.6% e aña aki. Mientras cu tur indicacion ta mustra cu esey a pasa caba den januari y februari. Pero di parti di mediador di gobierno, mester tin otro alternativa con ta resolve esaki awo y p’e proximo añanan. No por ta asina cu ‘tot nader orde’ ta keda riba mesa, pasobra cualkier empleado publico no por plania su bida si constantemente e no sa ki dia e recorte di salario termina.
Pa un cobertura mas amplio lesa e edicion di TREMPAN di mañan.
