Door di aumento drastico den e cantidad di caso di Covid-19, gobierno hunto cu CrisisTeam a tuma e decision di hala e fecha di apertura di aña escolar cu dos siman. Enves di scol a cuminsa dia 19 di augustus awo e fecha (tentativo) ta pa prome di september.
Pero no mester lubida riba e studiantenan di enseñansa avansa, den e caso aki EPI Sector Salubridad & Servicio cu lo mester cuminsa nan periodo di stage den e dianan aki. Scol a indica cu e muchanan mester cuminsa stage e siman aki. Algun di e studiantenan lo mester bay haci stage na hospital y esaki a pone cu algun mayor a bati alarma rib’ posibilidad cu e studiantenan lo mester subi piso B-3, cual ta e Covid-unit.
Un di e mayornan aki a acerca nos redaccion, door cu e ta preocupa pasobra entre e studiantenan tin muchanan hoben di apenas 17 aña cu lo mester bay stage tambe na Hospital. Pero esaki por tin su consecuencia pa tur e studiantenan, cu tin chens di bin cu e virus cas y pega nan famia na cas. E preocupacion di e mayornan ta cu ta pone bida di e studiantenan na peliger. CrisisTeam mes a fiha prome di september como fecha di apertura di aña escolar 2021-2022 y awo Colegio EPI no ta tene su mes na e decision aki.
Tambe e mayornan a indica cu nan a tuma contacto cu scol, via un email. Contesta cu nan a ricibi ta cu scol no por sigura cu lo por bin un cambio. Den un ultimo intento nan a manda un email pa Sra. Verstappen, cual ta e Unit Manager. Pero riba esaki tampoco nan no a haya reaccion.
Reaccion EPI
Como medio responsabel, nos di 24ora.com a tuma contacto cu EPI sector Salubridad y Servicio pa asina tambe haya e otro banda di medaya. Colegio EPI a splica nos redaccion cu e studiantenan cu lo core stage na hospital, no lo subi e piso B-3 cual ta Covid-unit. Pero nan lo haci trabounan basico di un enfermero, cual ta haci herida limpi, baña pashent, etc. Mirando situacion di pandemia, dificilmente e studiantenan lo bay riba e Covid unit. Di otro banda, mayornan tambe mester compronde cu cada trabou tin su bentaha y desbentaha.
