Diaranson minister di Enseñansa, Endy Croes, tabatin un rueda di prensa unda el a bay riba e topico cu e alumnonan no por keda cas, pasobra esey no ta un opcion. Un mayor ta hopi preocupa cu e situacion cu ta pasando na EPI, sector Horeca.
Esaki ta bin pa motibo cu diaranson nan a haya sa cu mester paga 795 florin p’e licencia di uza buki online. Nan mester paga esaki prome cu 31 di october. Si no haci esey, ta pone cu e alumno no por bay scol mas. Apart di e costo ey, tambe tin e echo cu schoolgeld ta costa mas o menos 475 florin. No por lubida cu tin norma di uniform y esaki ta algo standard di EPI Horeca. E uniform ta carson fini, sapato fini, camisa cu dashi of un ‘scarf’.
E mayor, kende a pidi pa ta anonimo, a sigui informa ni cu tin e studielening, cu ta un suma nada di gaba, pasobra ta mas o menos 2×1250 florin pa aña –compara cu e 10.000 prome pago, y 2 biaha mas 6.000 pa esunnan cu ta bay IPA- ta yuda. Despues cu e alumnonan a haya esaki diaranson, nan a sali hopi demotiva y disgusta. Nan a vocifera cu nan no tin manera pa cubri e gastonan. E lesnan ta cuminsa dia 5 proximo y ta awo a informa nan prijs di e bukinan. Antes por a cumpra buki segunda mano of por a haci copia, pero no mag of por haci esey mas.
Esey no ta tur cos, pasobra tambe ta exigi fo’i e alumno un laptop cu ta basta sofistica. Incluso si haci uzo dje computer den OLC tambe mester bay paga. E mayor ta hopi preocupa p’e situacion aki y su yiu ta demotiva. E ta haya un studielening cu ta yud’e, pero e no ta suficiente mirando cu e suma no ta gran cos. “Mi ta kere cu lo tin alumno cu lo opta pa no sigui nan soño y cu lo no bay scol pa dia 5 di september. Mi yiu mes kier hala atras”, e mayor a expresa.
