E autoridad cu un mayor tin riba su yiu ta bini di Dios, pasobra e yiu cu bo tin ta Dios a duna bo e. Awendia a lanta un cos nobo cu diferente grupo ta bisa cu e muchanan ta di nan, pero no cu bon intencion. Pero cu intencion di daña e muchanan su bida. Hasta e gruponan inmoral y diabolico a lanta cu kier cambia identificacion di e muchanan. Y hala e muchanan for di tempran den caminda di scuridad.
Un mayor tin tur autoridad riba su yiu pasobra ta door di dje e mucha ta na mundo.
Tin un palabra cu hende grandi ta uza bisando: Esun cu nunca no a pari, no conoce dolor di mama. Un mucha tin mester di su mayornan, y e mayornan mester di e mucha. E mayor tin un deber sagrado di percura pa bienestar , fisico, social y spiritual di e mucha.
Semper un mucha mester biba den e forsa cu su mayornan ta permiti, nunca un mucha no por ta biba for di forsa di su mayornan, cu e ideanan grandi cu su mayornan no por cumpli cu ne.
Ta mayor su deber di splica su yiu, kico e por alcansa, y siña e mucha con ta uza placa conscientemente for di chikito, pa e sa kico ta cumbini y kico no ta cumbini.
Nos ta bibando den un tempo cu e sistema di mundo ta hambra pa kita e autoridad di mayor for di riba e mucha. Door di bini cu e leynan, cual ta duna e mucha autoridad riba su curpa y cu e mayor no por dicidi pa e mucha, e leynan cu a sali for di fondo di fierno, e leynan cu cada dia ta causa division den famia.
Nos tur tin cu corda cu tur locual ta causa division ta bini di diabel,pasobra pa medio di division e kier scoge bentaha den bida di hende, cas y famia.
Corda riba esunnan cu a guia boso, cu a papia e palabra di Dios cu boso, y considerando e resultado di nan conducta, imita nan fe. Hesus Cristo ta mescos ayera awe y pa semper (Hebreonan 13:7).
N’e yiunan, sea obedecido na boso mayornan den tur cos,pasobra esaki ta agradabel na Señor (Colosensenan 3:20). Mi yiu tende e instruccion di bo tata y no bandona e siñansa di bo mama. Pasobra nan lo ta un bunita adorno pa bo cabes y coyar na bo garganta (Proverbionan 1:8-9).
Obediencia ta oro, comparabel cu diamanta y piedra precioso. Pero desobediencia ta bin di scuridad y ta hole manera webo putri, un holo cu ta dificil pa sconde.
Nos no mester lubida cu bida di un mayor ta un testimonio y un guia pa su yiu, locual e mucha mira su mayornan haci esey ta prome cos cu e ta copia, pasobra e mentor original di un mucha ta su mayornan.
Ora un mucha ta habri su boca y bisa ni mi mama no tin nada di bisa mi, esey ta nifica cu tin algo no ta bay bon na cas. Ora despues ora yega e momento cu e mucha ta bisa cu ningun hende no tin nada di bisa mi, esey ta nifica cu e enemigo a tuma control di su mente, pasobra autoridad di mayor a laga di desea.
Autoridad di mayor t’ey pa guia e mucha riba bon caminda, pa coregi, pa disciplina, pa produci bon ciudadano, pa mantene integridad, norma, balor y respet na halto den bida di e mucha.
Scuridad ta loer tur momento riba bida di nos muchanan y awor mas cu nunca scuridad ta aumenta (1 Pedro 5:8).
