Manera ta custumber, previo na e inicio oficial di e Interparlamentaire Koninkrijks Overleg (IPKO), ta tuma luga reunion di caracter Tripartite entre delegacion di Aruba, Corsou y St. Maarten. Esaki tabata e caso atrobe den fin di siman na Hulanda. Lider di fraccion di partido MAS, drs. Marisol Lopez-Tromp a indica cu un di e temanan cu a trata tabata e peticion pa haya un presentacion di e rapport Kopzorgen van Caribische Studenten. E no ta un rapport nobo ya cu ta data di aña 2020, pero e Ombudsman su representacion a duna un splicacion amplio di, no solamente e rapport, pero con leu nan ta pa ehecuta e sugerencianan cu a bin den e rapport.
Pregunta cu e parlamentario a haci ta dirigi mas riba parti di ora cu studiante yega Hulanda nan tin cu haya un un Burgerservicenummer (BSN) nummer cu ta nifica cu ta un sorto di registro, un number cu ta haya pa por habri cuenta di banco y diferente inscripcion mas cu tin cu haci. Si no tin’e ta pasobra no a inscribi na e gemeente y esey no por si no a haya un cas of camber. Kiermen, ta un problematica cu basta studiante ta pasa aden.
“Lo bo pensa cu Arubahuis mester tin un rol pa yuda agilisa e proceso aki”, segun Lopez-Tromp, motivo pa cual el a puntra ta con bin cu despues di 2 aña cu e rapport aki a sali, ainda e no ta regla. “Nos sa cu hopi cos, ora cu ta combini pa Hulandes por bin Aruba, peticionnan ta wordo haci, gobierno ta core haci procedura. Bo ta wak tambe cu si tin ley tin cu wordo cambia, ta core bin Parlamento; esaki pa nos studiante cu ta di henter e region, mas o menos un 1600 pa aña, riba su mes no ta dje tanto compara cu e miles y miles cu tin aki bou y tambe internacional.” MAS ta di opinion cu e BSN nummer lo mester keda bon regla y mas cla cu ta posibel.
Como contesta, e parlamentario a haya un splicacion cu tin diferente rond na mesa cu organisacion y a saca publicacion, pero ainda e no ta cla. Pa e parlamentario di MAS esaki ta un punto di preocupacion den e rapport aki.
Ta bisa tambe cu mester un miho preparacion prome cu nos studiante bay Hulanda. Esey ta conoci y ta kere cu ta un tarea cu tin cu fortifica mucho mas. P’esey ta sigui trece pa dilanti den Parlamento pa pais Aruba bin cu un organisacion specifico pa yuda nos studiante yega bon prepara. Otro preocupacion cu studiante ta menciona ta e debe despues di estudio y adapta na sociedad Hulandes.
Lopez-Tromp: “Loke nos fraccion a cuestiona ta e tarea di Arubahuis y a manda pidi e rapport di CAD cu ta wardando un par’i luna caba. Te awe ainda minister president no a saca e rapport of entreg’e. Nos a bisa cu CAD lo a entrega caba of tin e onderzoek cla caba. Nos ta kere cu e rapport aki lo mester por bay duna un claridad riba kico ta e deficiencianan cu tin cu wordo mehora, no solamente den Arubahuis, pero tambe kico a sosode. Kico ta loke onderzoek a demostra y kico tin pa mehora?”
Gobierno a menciona cu ta bay reorganisa, pero no ta comparti cu parlamento e rapport. Pa e parlamentario di MAS ta straño e tardansa aki pa e rapport; pa cual a manda 2 pa 3 carta pa recordatorio. Ta convenci cu Arubahuis tin hopi mas pa mehora.
