Daniele Ferrara ta presidente nobo di Aruba Food and Beverage Association a comenta riba e decision tuma door di gobierno pa adapta medidanan. El a haci un apelacion pa pensa hopi prome cu dal e siguiente paso pa amplia e medidanan.
Aruba Food and Beverage Association y comercio en general a keda confundi pa e anuncio haci door di gobierno diabierna. Esaki tabata den cuadro di adaptacion di e medidanan na vigor pa cu pandemia di COVID. Ferrara a splica cu mientrastanto awe a haya claridad riba e reglanan nobo pa loke ta e restaurantnan.
E asociacion, segun Ferrara, ta compronde pakico a adapta medidanan. Hopi hende a tuma nota di e situacion rond Aruba riba Dia di Himno y Bandera, unda cu e hendenan a sali for di cas y tabata parce cu no tin COVID mas na Aruba. E medida ta spanta nan pasobra ya caba turismo ta abou, cual ta afecta nan entradanan.
E impresion cu nan a haya ta cu despues cu e vacuna a yega, e hendenan parce a kere cu COVID no t’ey mas. Hasta tin negoshinan cu no a mantene nan mes cu e reglanan. Aglomeracion y e hecho cu no a respeta medida, a causa aumento di casonan y cu awo gobierno a trece un cambio atrobe.
Pa loke ta e medidanan, el a aclaria e anuncio di gobierno cu despues a keda publica den e corant oficial di gobierno (publicatieblad). Aki den por lesa claramente cu 4 hende por sinta paden y 6 pafo, basta si nan ta cumpli cu e reglanan y si nan ta di e mesun famia. Si no ta di e mesun famia, mester sinta na mesa di maximalmente dos persona.
Pa controla, el a bisa, e lo bay bira un poco dificil. Ta haya cu cada persona mester asumio nan responsabilidad pa cumpli cu e reglanan. Principalmente di doñonan di negoshi unda tin aglomeracion pa evita introduccion di shelter in place.
El a menciona e dos bandanan cu tin unda cu un grupo no kier medida y e otro cu ta na fabor di medida. Den un circumstancia asina, mester tira bista un poco atras. Specificamente el a señala e situacion di aña pasa unda cu den pleno desaroyo / prosperidad. Den un situacion di prosperidad a bini cu shelter in place cu a causa cu mas di 10 mil persona a perde nan trabou. “Kico ta pasa si inca un shelter in place den pleno crisis? Esaki ta loke nos kier evita.” E ta pidi pa mas perspectiva di parti di e grupo cu ta opensa pa bini cu mas medida, sin tene cuenta cu tur e efectonan cu esaki ta trece cu ne. E medidanan ta afecta principalmente HORECA. Ta pidi e hendenan cu ta pidi pa mas medida, pa pone nan mes den sapato di trahadonan di e sector di HORECA.
Ferrara a pidi a mira e situacion for di tur perspectiva, y evita un shelter in place cu lo por causa cu mas negoshi por bati bancarota.
E medidanan ta principalmente fastioso pa e turistanan cu ta biaha den famia of den grupo. P’esey e ta spera cu e clarificacion lo por alivia un tiki e situacion pa e restaurantnan.
E asociacion ta spera cu loke ta pasando aworaki na Aruba cu e casonan ta algo temporal y lo por pasa hopi lihe. Awo no por haci otro cu biba cu e medidanan, pero e siguiente paso si nan lo tin miedo di nan. E no ta cuestion cu si lo por biba cu ne, pero e lo ta un hecho cu bini cu e medidanan adicional manera aña pasa, mas negoshi lo bati bancarota.
Comerciante
Fabrizio Battaglia, propietario Piazzia Italia, a bisa cu e tampoco a keda sorprendi di e medidanan, mirando e situacion reinante na Aruba. Pero e resultado nan lo sinti’e ora cu e clientenan yega of no yega cu e decision cu solamente dos persona por sinta na mesa. “Nos lo sigui lucha.”
Aunke cu e ta respeta e decision di dos hende so na mesa, e ta kere regla anterior tabata mas valido pa nan mirando cu nan ta den aire liber.
E ta kere cu e decision ta tuma pensando riba salud na prome luga y despues pensando riba comercio. “E ta comprondibel.”
