Diadomingo mainta a tuma luga e prome competencia cu a haya e nomber di Tropic Alé Banana Run. Como mil deportista a inscribi y participa. Specialmente den categoria di mucha, a kibra record den cantidad di participante. E careda, organisa pa Compra Ltd, agente exclusivo di bacoba Tropic Ale, a start y a caba na Baby Beach na Sero Colorado, na San Nicolas.
Exito rotundo
Ana Maria Ramirez, brand manager di Compra Ltd., a indica cu nan ta masha contento con e evento a bay. E prome evento di Tropic Alé Banana Run a resulta den un exito rotundo y tabata masha bunita pa mira mil participante riba pia. Patrishi Sport a informa nan cu nan a kibra record den participacion den competencia di mucha. E careda aki a bira e competencia di mucha mas grandi di aña, aunke cu a organis’e pa henter famia, cu diferente categoria. A inclui un 3 mile walk & run y 10 mile walk & run p’e atletanan cu ta busca un reto extra.
Otro aña Compra ta di fiesta
Den luna di augustus a lansa e evento aki c’un donacion di cinco mil florin pa Kiwanis Club of San Nicolas, pasobra Compra Ltd. ta kere den e districto. Di parti Compra Ltd., henter e personal a bini hunto pa ofrece un evento grandi na henter comunidad. Otro aña Compra Ltd. ta celebra 75 aña sirbiendo comunidad. E competencia aki tabata e comienso dje gran celebracion.
Danki
“E Tropic Alé Banana Run tabata un exito rotundo”. Hubert Dirks, director di Compra Ltd., a indica di tabata hopi contento pa mira mas cu 1100 atleta participando, un mas miho cu otro, tanto recreativo como profesional. Tambe el a gradici e empleadonan, gerencia cu a organisa esaki y e pueblo di Aruba cu a responde grandemente. Dirks a keda masha contento di a topa Minister di Turismo hunto cu su yiu cu tambe a participa.
Lo bira un competencia anual
Idea ta pa haci esaki tur aña, pero e ta un competencia basta grandi pa organisa. Producto di Tropic Alé ta un producto cu pueblo ta cumpra hopi y por pensa di organisa anualmente un “Tropic Alé Banana Run”. Hubert Dirks a admiti cu nan a conta cu lo tin mas di shen participante pero nunca el a drumi soña cu 1.100 atleta lo inscribi.
E resultado (Adulto)
Den e categoria di 10 miya, bou di hende homber, e ganado absoluto a resulta William Diaz, cu a core den 54 minuut y 29 seconde. Den e mesun categoria, pero bou di hende muhe, e ganado ta Lana Gobert cu a yega bek den un ora y shet minuut y trintitres seconde (1:07:33). Den e categoria di 3 miya, bou di hende homber, e ganado ta Kelvin Gama Gonzalez, cu su tempo di 17 minuut y 34 seconde. Den e mesun categoria, pero bou di hende muhe, e ganado ta Marilinda Croes, cu su tempo di 25 minuut y 46 seconde.
E resultado (Hoben)
Tabatin un categoria di tres kilometer, specialmente pa e hobennan. Den e categoria ey, bou di mucha homber, na prome luga a yega John Giel, cu e tempo di 9 minuut y 44 seconde. Den categoria di mucha muhe, esun prome cu a yega final tabata Vera-Elise Bakmeyer, cu su tempo di 12 minuut y 36 seconde.
E resultado (Mucha)
Den categoria di 200 meter pa mucha, entre e mucha hombernan, e ganado ta Damian Alexnder, cu a core den 38 seconde. Entre e mucha muhenan, e ganado ta Sophie-Marie Solognier cu a yega den 41 seconde.
Den categoria di 400 meter pa mucha, entre e mucha hombernan, e ganado ta Zandre Geerman, cu a core den un minuut y diesocho seconde. Bou di e mucha muhenan, esun cu a yega final prome ta Louiselle Jarzagaray, cu a yega den un minuut y bintidos seconde.
Den categoria di 800 meter pa mucha, entre e mucha hombernan, a gana Jayrold Matos, cu un tempo di 2 minuut y 41 seconde. Den e seccion di mucha muhe, ta Haydilaine Matos a yega prome, den 2 minuut y 47 seconde.
Den categoria di 1,5 KM pa mucha entre 10 y 11 aña, entre e mucha hombernan, e prome pa yega final ta Liomar da Costa, den cinco minuut y diescuater seconde. Bou di e mucha muhenan ta Emma Gobert, cu a yega den cinco minuut y cuarentidos seconde.
Den categoria di 1,5 KM pa mucha entre 12 pa 13 aña, entre e mucha hombernan, e ganado ta Seanmar Bruges, cu un tempo di 5 minuut y 32 seconde. Den e mesun seccion, pero pa e parti di mucha muhe, e ganado a resulta Crisiene Flanegin, cu a yega final den 5 minuut y 28 seconde (miho tempo cu e mucha homber mes!).
Premio interesante
Pa e categoria di 10 miya, tabatin un premio di no menos cu Afl. 1000 cash, tanto pa e hende homber como pa e hende muhe, pero den e categoria “Overall”. Den categoria di edad, pa tur premio mayo a regala Afl. 200 na e ganado, tanto masculino como femenino. Na di dos luga a entrega un premio di Afl. 125 pa participante masculino y femenino y na di tres luga a gana un premio di Afl. 75 pa hende homber y hende muhe mescos.
Por subi riba e pagina di Facebook di Tropic Alé Banana of tambe www.BananaRunAruba.com pa mira tur potret dje evento aki. Ta manda palabra di gradicimento na tur persona cu tabata envolvi pa haci esaki posibel, pero keda pendiente p’e after movie.
Compra Ltd. ta yama DANKI
Compra Ltd., distribuidor di Bacoba Tropic Alé na Aruba ta gradici tur boluntario cu a haci e evento aki posibel, tur grupo di coremento, Ibisa y Patrishi Sports y claro tur participate cu a haci e Tropic Alé Banana Run uno grandi cu yen di ambiente.
