Esaki ta bira e di dos detencion den e caso di malversacion grandi di alrededor di 200 mil florin na CAPA. Esaki ta fondo dje miembronan di SEPPA. Despues cu a detene Joanne Jacopucci a sigui investiga. For di varios fuente, fo’i prome dia a bisa cu tin mas hende envolvi. Joanne Jacopucci hunto cu su pareha Dave Panneflek tabatin un vakantie basta caro y luhoso den exterior.
Probablemente cu e placa malversa di e miembronan di CAPA. Ora cu nan a bolbe di e dushi vakantie a informa Joanne Jacopucci cu e ta retira di trabou. Mientrastanto, a haci denuncia tambe na recherche. Ora cos a cuminsa bira cayente, Joanne Jacopucci, a purba huy bandona Aruba cu su yiu. A detene Joanne na aeropuerto algun siman pasa. E yiu so por a sigui pa tera friu.
Mientrastanto, Dave Panneflek tabata pendiente pa wak si e tambe por bandona Aruba sin cu nan ta mir’e. Purba burla di husticia. Diahuebs atardi tur bisti cu paña pa tera friu y cu jacket den man a check in cla pa subi avion pa Hulanda. Mescos cu su pareha Joanne, e sistema di Radex a dal luz cora pa Dave Panneflek. A pone un stop pa e sali di Aruba mirando cu e tambe ta un persona di interes pa e caso di malversacion grandi den cual Joanne ta sospechoso principal.
A detene Panneflek saliendo di Aruba y cu transporte policial a hib’e na warda di recherche na Wayaca. Tur cos ta mustra cu Dave y Joanne lo pasa Pasco sin libertad y cada uno den un cel diferente. Si ta bon, Joanne a yega KIA caba. Dave lo pasa su prome dianan deteni cu ta inclui Pasco y Aña Nobo den un cel pero na un ward’i polis. Con grandi su rol ta no ta conoci. Loke si por bisa ta cu el a disfruta hunto cu Joanne di un placa cu nan a yega den un forma di malversa.
