E situacion ta hopi tristo pa hende muhe na Aruba n’e momentonan aki. Ultimo luna sigur, por a scucha hopi keho riba e problema pa por haya cita cu Ginecologo. Pero ta parce cu e ta un situacion grave di berdad. Aunke cu tanto Minister di Salud Publico como Seguro Medico General (AZV) a indica cu ta traha riba un solucion, e ta keda un preocupacion.
E poblacion di Aruba n’e momentonan aki ta consisti di 107.327 persona. Di e cantidad aki, 56.852 ciudadano ta di e sexo femenino. Pues casi 53 porciento di e poblacion ta hende muhe. Esaki ta importante pa sa, den e problema cu tin actualmente cu un dokter specialisa den hende muhe.
Pa algun tempo tin hopi cuestionamento ora cu a dicidi di laga un dokter masha stima bou su pashentnan bay, despues cu e mes a pidi su retiro. Por a compronde cu el a haci esaki, p’e falta di comunicacion, dialogo cu otro instancia den sector di cuido.
E situacion a bira preocupante ora cu despues mas Ginecologo a dicidi cu nan ta bay bandona Aruba pa motibo di no por traha bou di e sistema existente. E situacion a empeora pa motibo cu no ta sinti cu ta scucha nan bos, scucha nan pensamento riba kico por t’e miho forma pa brinda un servicio di calidad n’e hende muhenan di Aruba.
Aruba a logra uni tur e Ginecologonan bou di un solo capa cu a yuda mehora servicio den e ramo aki. Pero esey no tabata pa mucho largo. Awo tres di e Ginecologonan aki ta bay bandona Aruba. E situacion t’asina complica cu practicamente dos Ginecologo tin den funcion p’e poblacion femenino di Aruba.
A ricibi keho di hopi hende muhe, kendenan ta preocupa. Ta yama e oficina y no ta haya contesta. Ta laga respondi, y no ta haya contesta. Un señora a conta cu for di final di juli a yama, y nan a keda di avis’e bek pasobra “no ta dunando cita ainda”. E señora su situacion no a mehora pasobra, el a haya un complicacion cu su menstruacion cu te ainda no a soluciona y tampoco a soluciona su intento pa haya contacto cu e oficina di Ginecologia.
Ta imposibel pa kere, un ciudadano a bisa, cu tin solamente dos Ginecologo disponibel p’e poblacion femenino di Aruba. Esaki ta causa cu e situacion di cada pashent por empeora y hasta bida ta core peligro mientras cu ta spera pa haya un cita.
HISTORIA
E poblacion femenino den diferente epoca ya caba tabata mas grandi cu esun masculino. Si wak e cifranan di 1993, e tempo ey e cantidad di hende muhe na Aruba tabata 38.840 y 30 aña despues esaki a yega na 56.852. Pues un poco menos cu 20 mil hende muhe mas a bin acerca.
Ta spera cu pronto por yega na un solucion pa e problema aki.
DATONAN DI HENDE MUHE
E cifranan di 2022 cu Censo a acumula di e aña completo ta mustra cu 62% di e poblacion ta hende muhe di entre 18 y 64 aña; 19% ra cay bou di 0 pa 17 aña y e otro 19% ta di 65 aña bay ariba.
Pa loke ta mercado laboral, 53% ta participa den e mercado laboral, 43.4% ta inactivo y e cifra di desempleo bou hende muhe ta 6.6%.
Di tur e hende muhenan trahando (15+), 29% ta den sector di servicio of benta; 11% ta tecnico of semi-profesional.
Otro dato interesante ta cu 50% di e hende muhenan nunca a casa y e edad averahe di esunnan cu a haya yiu tabata cu nan 24 aña.
Den area di politica 38% di e asientonan ta ocupa pa hende muhe.
CENSO 2020
Censo 2020 a duna como resultado cu 42% di e hendenan ta biba den seno familiar, di cual 52% ta biba den un vivienda di un pareha casa cu yiu.
Un total di 99% di mucha muhenan di entre 4 y 16 aña ta atende scol. Solamente 6% ta bay Universidad. Pues datonan interesante.
