Secretario di Estado Alexandra van Huffelen di Relacionnan den Reino lo haci un bishita di trabou for di 30 di september te cu 5 di october na Sint Maarten, Corsou y Boneiro. E bishita principalmente ta marca pa e aña di conmemoracion di pasado di sclavitud. Asina, e lo participa na un sesion di Catshuis na Sint Maarten hunto cu e representantenan di tur seis isla y lo e ta na Corsou pa e rehabilitacion di Tula. Ademas, e Secretario di Estado lo hiba combersacionnan administrativo na Boneiro tocante di e leynan cu ta regula e relacionnan administrativo y financiero entre Hulanda Europeo y Hulanda Caribense, e WolBES/FinBES.
Sint Maarten
E bishita di trabou di Secretario di Estado, Alexandra van Huffelen, ta cuminsa riba diasabra 30 di september na Sint Maarten cu un encuentro cu prome minister Jacobs. Riba prome y dos di october, e sesion di Catshuis lo tuma luga, caminda e Sekretario di Estado lo papia cu e representantenan di Corsou, Aruba, Sint Maarten, Boneiro, Saba y Sint Eustatius tocante e influencia di pasado di sclavitud y con ta duna contenido na e aña di conmemoracion di pasado di sclavitud. Un parti special di e encuentro aki ta un sesion di ‘break-out’ ku e parlamento hubenil di Sint Maarten.
Corsou
Riba e anochi di 2 di october, Secretario di Estado Van Huffelen ta bay Corsou. Riba 3 di october, e ta papia cu Hendenan Muhe di Corsou tocante, entre otro, e influencia di pasado di sclavitud. E dia ey tin tambe encuentronan cu prome minister Pisas y gobernador, y e anochi ta dedica na rehabilitacion di Tula, kende na 1795 a lidera e gran rebelion di sclavitud na Corsou.
Durante e bishita na Corsou, tambe tin plania un bishita na Swaen Village, un encuentro cu organisacionnan cu ta compromete na sirbi e comunidad LHBTQI+ na Corsou, un combersacion cu e studiantenan di economia di Universidad di Corsou y un mini conferencia cu e sector social.
Boneiro
Durante e bishita na Boneiro riba 5 di october, e Secretario di Estado lo tene combersacion administrativo tocante di e leynan cu ta regula e relacionnan administrativo y financiero entre Hulanda Europeo y Hulanda Caribense, esaki ta, e WolBES/FinBES. Den e cuadro aki, e ta sinta na mesa cu e grupo di trabou WolBES/FinBES, Colegio Ehecutivo y Conseho Insular.
Riba diamars 5 di october, Secretario di Estado van Huffelen ta biaha bek pa Hulanda.
