Un pashent a bin dilanti pa expone otro caso cu segun e, ta negligencia medico serio. Pa mas di tres siman e ta canando un caminda di cruz cu su señora cu ta e pashent cu ta den dolor y te ainda no por ricibi atencion medico. Juan Castro a conta 24ora.com cu su casa a yega dokter di cas pa un dolor fuerte di horea di cual e tabatin mester di atencion medico. A reseta remedi pa dolor.
Dianan a cuminsa pasa y e dolor no a mehora, alcontrario tabata sinti cu e situacion a empeora y cu lo ta trata di un infeccion mucho mas serio. Mientrastanto e famia Casto a enfrenta cu contagio di Covid-19 cu a pone cu nan tur a drenta den cuarentena.
Castro ta conta cu e preocupacion a bira grandi mirando cu mientras nan tabata busca yudansa medico e situacion cu e horea a bira pio, te cu el a rementa sanger y cu dolornan hopi fuerte pa e pashent. Te cu awe niun caminda a atende cu su casa, ni na dokter di cas, ni na specialista ni tampoco eerste hulp.
Segun Juan Casto, nan a cumpli cu e dos siman di cuarentena caba y ta mira cu ni asina ningun dokter kier atende su casa, te hasta nan a pidi pa presenta cu un test negativo di DVG pero actualmente DVG a informa nan cu no ta ehecutando e di dos test mas, solamente si ta presenta sintomanan di Covid-19 lo efectua test. A bolbe bay dokter di cas pa asina haci peticion pa e covid test, di cual ainda nan ta wardando yamada pa e test aki tuma luga.
Na prome instante e dokter di cas a atende e pashent via whatsapp, aki a pidi un verwijsbrief pa e por bay un specialista, pero nan no a atende su señora na specialista pasobra riba e verwijsbrief no ta poni cu e ta un caso di urgencia. Ta continua e intento y ta tuma contacto cu e dokter di cas un biaha mas y aki ta informa nan cu e dokter di cas ta cu vakantie y lo regresa te fin di september y cu e dokter na su luga no por atende cu e situacion aki.
Den tur nan intentonan a purba e opcion di bay IMSan caminda nan a ricibi calmante pa e dolor pero en realidad locual cu e pashent mester ta un specialista mirando cu den nan bista e situacion ta empeorando y e horea ta saca likido y sanger keto bay.
Juan Castro ta bisa cu el a bay tur caminda, a opta pa yama e medio mas grandi na Aruba, 24ora.com pa mira si asina por logra haya yudansa pa su casa. Mientrastanto nan a presenta na eerste hulp y a informa nan cu e caso no ta urgente y no a atende nan. Casto no por compronde kico ta cay bou di urgencia e ora. Si esaki no ta urgente anto ta kico lo tin cu tuma luga e ora, e lo tin cu muri of algo grave pasa su casa pa e bira un urgencia?
Tambe ta menciona cu ta paga AZV sin por ricibi atencion medico como tambe paga gastonan medico adicional pa ricibi hangua pa calma dolor of pa asina nan atende cu nan peticion pero sin mira dokter mes.
No a resta mas caminda pa bay !
Lina Maria Castro ta yora tur dia di dolor pa mas di dos siman caba y ta desespera. Por a tuma nota cu Lina ta hopi delicado, ta mustra di ta den hopi dolor y kasi no por expresa su mes. Na eerste hulp nan a bis’e cu su situacion no ta un emergencia y cu e no lo muri di esey. Lina ta pidi den tur su desesperacion pa por fabor un hende tene piedad y brind’e ayudo cu e mester urgentemente. E ta conta cu e no ta drumi, e dolor ta insoportabel. E ta willing pa paga como particulier pero ni asina nan kier tum’e. Cu carta (verwijsbrief) pa specialista den man pero sin fecha pa haya cita.
Kico ta e motibo cu no a yuda nan?
Segun Juan Castro, nan a cumpli cu tur cos, sigui tur protocol, asina mes no ta haya yudansa. Tambe ta cuestiona cu si dokternan ta frontliners di salud dicon nan ta nenga di atende cu pashent. Ta pesey nan tey! Segun Castro, e ultimo palabra pa comunidad ta “Que en Paz Descance” pasobra manera cos ta bay asina aki nos ta bay muri!
