Awe den oranan di mainta a bandona Aruba e ultimo vuelo di repatriamento di Venezolanonan pa loke ta 2020. Pero tambe e por ta e ultimo vuelo di e indole aki, mirando e maneho cu ta bay tin den 2021, segun Marllorie Medina di Fundacion Venezolanonan Uni a indica na despedida di e pasaheronan.
Un total di 640 pasahero a bandona e isla riba e 5 vuelonan aki y cu a haci cu Venezolanonan tabata e grupo mas grandi di persona cu a dicidi di bandona e isla di forma boluntario debi na e pandemia. Despues ta sigui Republica Dominicana. E vuelo di mainta a transporta 140 persona.
E informacion cu e Fundacion a ricibi, segun sra. Medina, entrante 15 di januari awo ta bay habri frontera entre Venezuela y Aruba, pero ta bay exigi visa pa e Venezolanonan. E negociacion ta andando entre Embahada di Reino Uni y e dos pais paisnan.
Tin hopi Venezolano, rond di 2 mil, cu kier bolbe nan pais. E problema ta pa haya e placa pa paga e pasashi, e test di COVID y e impuesto di salida. E ta sali casi 400 dollar. E repatriamento tabata un exito completo y “hopi a keda sin come basta nan reuni e placa pa bolbe nan pais,” el a bisa. E fundacion mes no por a yuda nan cu placa, pero sin cu material, manera paña pa esnan cu tabatin mester di esaki.
Pa loke ta e cambio di maneho di gobierno pa 2021, el a bisa cu introduccion di visa pa Venezolanonan no ta nada straño. Pero si e fundacion ta haci un apelacion na e instancianan concerni pa tin mas compasion pa esnan cu ta bandonando Aruba y menos restriccion pa esnan cu ta bin bishita famia.
Un di e personanan cu a bay for di Aruba ta Alejandro Soto, kende a yega na augustus, 2017 y ta sumamente contento con nan a trat’e na Aruba. E situacion cu mundo ta pasando ta aden, ta miho pa cada persona ta na su mesun pais, cerca di familiarnan.
