E ultimo debate entre lidernan politico Hulandes, por a sinti caba ki direccion e votadonan lo tuma. E mesun puntonan cu ta hinca den e programa di partido cu a bay campaña cu ne ta mustra cu ta atende cu loke ta e preocupacion di e pueblo. Hasta por a sinti den expresion di miembronan di Tweede Kamer caba con e inclinacion lo ta lo ta pa cu e islanan aki.
Drs. Marisol Tromp di partido MAS, a bisa den un entrevista cu na final di e ultimo debate politico, prome cu eleccion, ya caba por a mira e tendencia cu tin na Hulanda. Pues por a mira ki direccion e votamento lo bay.
E resultado, di e asientonan cu cada partido a haya, ta mustra con e pueblo a expresa nan sentimento. Tin cierto partido a crece y ta mustra cu e votadonan “kier Hulanda mas pa nan mes bek. Nan ta sinti cu nan derecho no ta manera mester ta.”
Pero banda di esaki tin problema na Hulanda cu escasez di vivienda y hasta den enseñansa ta poni den programa di partido cu mester baha e cantidad di studiantenan internacional cu ta acepta aworaki. Tur hende por corda con antes Hulanda a habri su mannan hancho pa ricibi studiantenan internacional.
Tromp a indica tambe cu den e diferente biahe pa Ipko of encuentro cu coleganan di Tweede Kamer, a mira cierto tendencia. Esaki a bini desde cu e gobierno di Aruba cu su actitud terco y bringando contra RAft y palabracionnan haci, Tweede Kamer tabata basta rasca.
Y den e reunionnan di Ipko a expresa nan mes cu ta e placa di pagado di belasting ta uza, y cu a lo largo mester responsabilisa nan mes cu nan votadonan na Hulanda. “Esey ta frasenan cu antes no ta trece asina facil dilanti. Nan tabatin mas un tono di cooperacion.”
E tempo cu ta bini lo mester bay mustra, cu e formacion di e gobierno nobo, con Geert WIlders su programa di gobernacion lo ta.
Tromp a bisa cu e resultado na Hulanda ta algo cu el a mira na eleccionnan na otro parti di mundo. Tin un inclinacion derechista. Por corda cu gobierno di Hulanda a cay debi na asunto di asilo y inmigracion. Pues tin basta inkietud bou pueblo cu ta sinti nan mes menos confortabel cu e tendencia di ultimo añanan pa e maneho di inmigracion.
Awo ta di sinta warda pa mira con Geert Wilders lo bay atende e proceso di formacion.
