Diahuebs Parlamento di Aruba a sigui cu e tratamento di e Ley di RAft, cual ta e Ley di Supervision Financiero. E ultimo aki ta relaciona cu e pago di e Coronaschuld y situacion di likides financiero di pais Aruba.
Lider di fraccion di MAS den parlamento, drs. Marisol Tromp a indica cu manera cu e reunion a habri, el a pidi un punto di ordo. El a pidi Minister President pa pone e documento/carta/proposicion cu supuestamente e lo a haci na Hulanda recientemente pa loke Aruba kier pa supervision financiero. El a menciona e nomber di e documento, cual nan a haya tambe.
Loke a resalta pa Tromp ta cu cartanan a bay y bin entre Minister Presidente y Van Huffelen, for di aña pasa y te cu awo. Pero loke a bin dilanti ta cu ta e propio Minister Presidente di Aruba ta esun cu ta tranca henter e proceso di negociacion.
Di parti Hulanda nan a pone como condicion pa refinanciamento, pa bin cu e ley di RAft, es decir un supervision financiero na nivel di Reino. Semper e partidonan di coalicion a bisa cu nan ta contra di Rijkswet y cu por regl’e na cas mes.
Tempo a mustra cu lamentablemente esaki no a sosode y cu e situacion a bira pio. Tweede Kamer a vota riba mocionnan cu nan kier wak kico tur na kier wak den e Rijkswet pa refinanciamento.
Pero den e cartanan Tromp a ripara cu Minister President, no solamente tin dos cara, pero ta papia cu dos lenga. Den e corespondencia por lesa bon cla, exactamente kico nan cada un ta bisa otro den e cartanan.
Hulanda ta pone enfasis mester tin ‘begrotingsnormen’ cu mester traha den e cuadro ey. Segun Tromp, ta mescos cu ora c’un trahado ta haya su salario, pa paga debe, etc., e lo mester mantene su mes na loke e tin na entrada of busca un otro entrada.
Loke parlamentario Tromp kier pa Gobierno compronde ta, cu mas nan tarda den acepta e condiciconnan di Hulanda, mas e pueblo ta bay paga pa e debe aki.
Pa mas, lesa TREMPAN
