Recientemente CAF a bolbe manda un carta pa Gobierno di Aruba, unda cu e ta bolbe ripita cu Aruba, no ta cumpliendo cu e recomendacionnan. Di e 13 recomendacionnan cu Aruba (cq. Gobierno) a haya, a cumpli cu solamente 1 di nan.
Diabierna Gobierno di Aruba a manda un carta pa CAft, unda cu e ta enfatisa cu e meta comun ta pa yega na un finansas publico sostenibel pa Aruba. Door di COVID-19, Aruba no tabata por a yega na un surplus necesario. Ta bay tuma tempo pa esaki. Segun Minister Xiomara Maduro, mester haya un balansa entre ehecuta e reformanan di e Landspakket y tambe cumpli cu e normanan financiero stipula.
Riba esaki, lider di e partido di oposicion MAS, drs. Marisol Lopez-Tromp, a reacciona riba e carta di gobierno pa CAft.
Segun Lopez-Tromp, ta parce cu gobierno no kier kita e 12.6% ful. A pesar cu CAft ta bisa cu mester kit’e, pa baha gasto di gobierno, esaki na su turno ta bisa pa e college dunanan espacio pa nan mes hacie, pa determina con e normanan ta, pa baha gasto.
Loke gobierno mester haci ta pa baha e gastonan di personal, segun e rapport di recomendacion. No mester bin cu niun norma pa baha gasto.
Tur ora Minister di Finansas y Minister-presidente ta bisa cu nan ta bay kita e 5%, pero si lesa e contesta bon, nan no kier kit’e for di nan mes. Nan kier sigui sac’e for di e salario di e empleadonan publico.
