Fundacion Maria Liberia Peters a tuma riba nan mes pa e gran politico di Corsou, Moises da Costa Gomez su imagen mester ta semper impecabel. No solamente pasobra e ta fundador di Partido Nacional pero tambe pa e rol importante cu el a hunga den politica di su pais.
Den e siman cu ta tras di lomba, e fundacion a devela e estatua renoba di e gran politico aki, cual estatua ta situa den Willemstad. Den un evento asina no por faya presencia di un otro politico importante di Corsou, y presidente di e fundacion cu ta hiba su nomber: Maria Liberia Peters. E echo cu gobierno a dicidi di proclama mr. Dr. Moises da Costa Gomez como heroe nacional “ta un cos asina emocionante cu mi mester di tempo pa asimila esaki”.
E intencion di e fundacion ta pa mantene historia politico di Corsou na bida. Liberia Peters mes, un ex-lider di Partido Nacional, ta haya cu el a biba un situacion di ironia. E mes no a conoce da Costa Gomez personalmente. E gran politico aki a fayece na aña 1966. Si el a conoce e viuda di da Costa Gomez na 1967 na momento cu e mes a cuminsa traha na Inspeccion di Enseñansa, unda nan a traha hunto.
E mes a subi lista na 1975 pa eleccion di Eilandsraad. “Nan a pusha mi pasobra mi tabata hopi activo den comunidad cu proyectonan social. Door cu ta aña di hende muhe ta bay purba subi lista un biaha so. Pero mi a keda.”
Como un integrante di Partido Nacional, el a percura pa conoce historia di doctor da Costa Gomez. “Loke cu a enrikese mi di doctor ta e combersacionnan cu mi tabatin cu hendenan grandi den e Casnan di Anciano. Ora cu mi a tende e historia, cu no tabatin derecho di voto, y cu gran cantidad di pueblo no por a vota, nan a conta mi con nan tabata sinti. E hendenan cu tabatin moda si por a vota y e otronan no. Ta e doctor a trece cambio. Mi a sigui profundisa te cu mi a skirbi cinco buki riba esaki.”
El a recorda tambe cu den añanan cuarenta (1940) tempo di Conferencia di Mesa Rondo e dos nombernan cu tabata resalta ta da Costa Gomez y Eman.
Otro echo ta cu hopi hende na Corsou no tabata consciente cu doctor da Costa Gomez tambe tabata activo den politica na Aruba. El a encabesa e lista di partido na 1958. Algo cu hopi hende no tabata sa.
