Diabierna anochi tabatin un actividad masha anima pa e studiantenan di examenklas di Maria College MAVO. E scol tin grupo di docente cu ta organisa actividad bou di e lema di e scol cu ta: “I am Because We are” y a hinca den otro un anochi Hersengymnastiek den Club Caiquetio como antesala pa e temporada di examen cu ta cuminsa dialuna awo.
Otro obhetivo di e actividad, fuera di entretene y distrae, tabata pa mustra e alumnonan di vierde cu nan no ta klasnan separa, pero ta tambe ta alumno di henter e scol. Nan no ta nan so. Tin 170 candidato di examen pa aña escolar 2021-2022. Jaci-Rose Stamper, un di e docentenan di e scol secundario na Playa, a splica cu e studiantenan a bin ta prepara hopi bon.
“Por bisa cu nos ta sumamente orguyoso y impresiona pasobra despues di e resultado di e tres periodo, mayoria ta para pa slaag. Nan Ta drenta e periodo di examen cu hopi expectativa y hopi probabilidad.” Tur docente ta desea nan un bon temporada di examen.
