“Riba e RWZI (Rioolwaterzuiveringsinstallatie) ainda no tin un decision final, cu mi sa. Pero naturalmente e ta algo sumamente urgente,” tabata e reaccion di parlamentario di fraccion di MEP, Marco Berlis, ora cu a bay riba e tema aki cu ne.
E problema cu RWZI ta sigui empeora, mientras cu no tin solucion rapido na caminda. Ta finalisando luna di maart y ainda no a trata e tema aki den parlamento, e traspaso for di bou DOW pa Utilities Aruba N.V. Esey ta algo cu mester a sosode un aña pasa caba. Mientrastanto, e placa cu tabata reserva pa RWZI ya caba a haya destino. Entre otro pa e post di caretera.
Tres luna ta pasando y ainda nada di traspaso pa mannan priva y ni parlamentario di e fraccion MEP, Marco Berlins, cu ta forma parti di e coalicion, ta mucho na altura di kico ta pasando, si scucha su declaracion.
Mirando cu tin mas hotel na caminda, pero tambe cambernan adicional di hotelnan existente, e ta consciente cu esaki lo pone mas presion riba e instalacionnan existente (Bubali, Parkietenbos y Zeewijk). “Esaki ta nifica cu decisionnan mester cay. Mi sa cu gobierno ta den un fase final di tuma decision. Nos ta spera riba esaki pa por vocifera un opinion tambe. Ta dificil pa bisa algo si nos no sa kico ta e ultimo decision y ki ta bay wordo haci.”
Loke si e sa ta cu e no ta esun sinta den stoel pa tuma decision riba RWZI.
