Algun dia pasa mi a tuma nota di un conferencia di prensa di mi colega Gerlien Croes. Den e rueda aki Croes ta exigi un reunion publico pa trata e investigacion cu ta encera Eddie Briesen, den e caso cu yama Kwihi. E stunt politico aki Croes kier hunga mientras e investigacion apenas a cuminsa, ya cu ora ta haci inval ta pa OM acumula material pa nan por haya evidencianan pa e caso. Awor e hipocresia di Gerlien Croes ta obvio, ya cu el a wordo puntra masha hopi biaha den pasado tocante di su opinion den e caso Ibis y Avestruz, pero nunca e tabata tin e curashi di contesta.
Finalmente, no mucho tempo pasa el a laga sa den parlamento, cu ora e veredictonan cay den e casonan aki, e lo sali vocifera su opinion. Ainda nos ta wardando pa su opinion y declaracion den caso IBIS, ya cu pueblo sa cu diamars mainta 21 di februari 2023 Paul Croes a entrega su mes pa wordo cera den KIA. Adicionalmente, a sali diamars mainta pa via di comunicado cu e veredicto di caso Avestruz lo keda cla pa dia 14 di april 2023.
Siguramente pueblo henter por a wak e ‘double standard’ cu Croes ta opera den dje. Muisstil riba e casonan historicamente bergonsoso pa henter Pais Aruba, den cual a regala y malversa miyones. Gerlien a keda keto y no kier duna un opinion riba dje. Pero riba un investigacion nobo di Kwihi e ta exigi un reunion publico inmediatamente! E tipo di actitud aki di Gerlien Croes ta evidente y ta confirma cu e ta tapa y brasa e corupcion di su propio partido. E no tin weso di lomba pa denuncia e fraude y abuso di poder cu e sospechosonan den su mesun seno a comete, pero awor kier hunga politica cu un caso nobo.
P’esey e pregunta clave pa Gerlien ta: Dicon bo no a pidi un reunion publico pa trata caso IBIS of Avestruz? Bo ta contra corupcion, pero selectivamente, pasobra e no por ta di bo mesun partido AVP? Kiermen hamas bo ta bay denuncia e desastre, ladronicia, fraude, abuso di poder y corupcion di bo mesun partido? Bo sa si cu pa prome biaha den historia un politico aki na Aruba a wordo cera cu un sentencia asina largo y e ta den bo partido? Gerlien ta lucha pa integridad y pa pueblo, pero ta aproba y ta muisstil riba corupcion den su propio seno y memey di su propio colega y amigonan? Esey nos ta yama ‘e double standard comun’ cu boso ta propaganda den AVP.
Ademas bo silencio ta mustra bo debilidad y bo parcialidad, cu partidismo berde ta bo prioridad y no e interes comun di pais Aruba. Esaki ta e bon comun cu boso ta papia di dje? Mientras por cuestiona MEP, cada un di nos a papia y lo sigui papia abiertamente di tur caso y tur investigacion, incluyendo esunnan di Gerlien. Nos lo denuncia esakinan sin importa di cual color e ta! E ta bergonsoso, si e ta berde, geel, blauw of cualkier color. Bergonsoso pasobra bo no ta mancha un partido pero un pais, dañando e confiansa cu pueblo mester tin den politiconan!
Hamas e cosnan aki mag di bolbe sucede! Pero pa esunnan cu ta persisti di haci malo y kier enrikece nan mes riba custia di pueblo esaki ta un mensahe cla y raspa na bo: Un Ministerio Publico empodera lo sigui actua cu man riguroso y fuerte contra tur esunnan cu ta abusa di nos pais Aruba, y hamas niun di nos lo tolera esaki! Asina ta Gerlien Croes, madura y siña para na e defensa di e pueblo cu nos ta representa, y no solamente e partido di “double standard” comun cu abo ta profila bo mes riba dje!
