Diabierna mainta Secretario di Estado, Alexandra van Huffelen, a comparti e grato noticia cu Aruba no a haya un aanwijzing di RMR. Esaki ta pasobra cu gobierno a adapta e presupuesto 2022 suficiente na e normanan di RMR cu e mester a cumpli cu ne, y asina van Huffelen a elogia e esfuerso di gobierno y su profesionalnan cu nan ta riba e bon caminda. Ta importante pa Aruba yega na un finansa y economia sano y cu e por paga su debe y haci inversion atrobe den e pais. Esaki ta e enfoke di Hulanda, pero tambe di gobierno cu a bin hereda un megadebe cu tabata casi na 90% di nos GDP, sin conta e proyectonan PPP aden.
Cu e decision aki di no duna gobierno un aanwijzing, un etapa nobo ta cuminsa. Un etapa unda cu nos fraccion di MEP a demostra curashi ora di mester a tuma e decisionnan y un postura fuerte ora cu mester a trata e tema di 5% bek pa e ambtenaarnan y tambe e ley di LNT, cu nos fraccion a instruccion di haci cambio (amendeer). Oposicion tabata categoricamente haya di esaki y a vota contra ambos, e 5% bek p’e ambtenaarnan y nan tabata kier a pasa e LNT manera e tabata. Dowers a hasta chercha nos fraccion cu e ley di LNT lo bin bek y cu nos lo mester pasa esun original. Aki bo ta wak cu e ta tuma vision y curashi pa tuma e decisionnan cu ta beneficia pueblo. Como representante di pueblo bo mester ta profesional suficiente y alabes tribi di keda na mesa, dialoga, studia posibilidad, haci investigacion y esfuerso necesario pa bringa pa pueblo. Hasta si esaki ta contra di e boluntad di Hulanda.
Tambe mi a expresa na varios ocasion cu nos como Parlamento mester para pa nos pensamento- y ideanan, y lucha pa nos pueblo, hasta si Hulanda no ta di acuerdo cu algun di e puntonan. Mi ta kere den keda dialoga, para pa loke ta corecto y husto, tin un postura positivo na tur momento cu Hulanda, y asina tambe ta alcansa nos metanan di manera colectivo. No tur ora nos lo por topa otro, pero como e representantenan di pueblo nos mester pone nos pueblo prome.
Oposicion no ta dispuesto pa haci esey y ta keda pusha pa aanwijzing, dobla pa tur loke CAFT kier sin tene pueblo na cuenta. Sin tene cuenta cu e empleadonan di Serlimar, sin tene cuenta cu RWZI, sin tene cuenta cu e homber chikito, y sin tene cuenta cu nan mes, esta Marisol y Mike Eman a aproba y maneha nos pais como ex- premier y ex- presidente di Staten y a hiba nos pais den e crisis mas financiero mas grandi den historia di nos pais. Awe Marisol ta haci manera e no sa di nada y no tin culpa, pasobra e ta lider di un partido nobo. Marisol, bo man y bo actonan ta mes sushi cu esun di Mike Eman! Boso tur dos a zorg pa CAFT yega Aruba, ambos a causa y aproba e megadebe y awor boso ta elogia y kier apoya tur punto di CAFT cu boso mes a bringa na 2015?
Cu e declaracion di Alexandra van Huffelen, Secretario di Estado di Hulanda, nos pueblo por finalmente wak cu Hulanda ta aproba e maneho di gabinete Wever-Croes-II, ta elogia su progreso y su resilencia. For di akinan un pabien grandi pa Minister Xiomara Maduro y tur su profesionalnan, Minister President Evelyn Wever-Croes y henter e Gabinete! Ban pa mas, pasobra nos no a yega ainda unda nos mester ta!
