Den e buki di Huesnan capitulo 16, Samson nunca por a pensa cu un dia, e Spirito di Dios lo bandon’e pa motibo di pica y e enemigo a probecha pa saca su wowo y asina haci Samsom un homber cu forsa bira esclavo.(Juesnan 16:21).
Asina tambe pica ta domina hende haci nan esclavo sin nan ripara, mas bo chansa cu pica pocopoco bo ta wordo derota, no ta importa bo forsa fisico, pasobra maldad no ta respeta forsa humano, pero solamente e nomber di nos Señor Cristo Hesus.
Samson a stima caminda hende tabata busca su bida pa kita, e muher tabata un empleado di su enemigo, cu tabatin e encargo pa caba cu ne.
Hopi biaha pasion, deseo carnal y un mente dirgi riba placa ta haci hende ciego y cu nan no ta ripara den cual direccion nan ta bay y nan ta perde matrimonio y famia pa motibo cu nan no tin temor di Dios, tampoco dominio propio.
Tin biaha bo ta puntra bo mes con hende por yega asina leu y cu nan no ta mira cu locual nan ta haci no ta bon pa nan pero bo tin cu compronde cu nan ta den gara di satanas, y cu ta solamente e palabra di Dios por ranca nan saca fo.
Dios hasta ta permiti e enemigo spanta nan pa nan sali y bin bek riba e caminda di Dios, pero en bes di sali for di scuridad, nan ta busca tur manera pa keda den e asunto.
Hopi biaha hende ta tuma tur su amigo y conocirnan na malo, pa e sigi den e caminda robez y no ta ripara cu locual e ta mira bunita y bon ta hib’e na destruccion.
Ta parce manera e persona ta burachi, mal bebi y no por maneha su auto y e ta pretende cu e mes mester stuur, pasobra e auto ta di dje y ningun por bis’e locual e tin di haci y e ta subi caya causa accidente y tin biaha kita bida di hende inocente .
Santiago capitulo 4:17 ta para scirbi; P’esey pa esun cu sa di hace loke ta bon y e no ta hacie, pa esaki e ta un pica.
Si bo sa masha bon cu bo tin cu cria bo yuinan y bo tin cen of bo tin trabao y bo no ta crianan, e ta wordo conta como pica dilanti di Dios.
Ora bo sa masha bon cu bo no por tin mas muher/homber den bo matrimonio bo ta haciendo bofon di Dios y tambe di bo casa, pasobra locual Dios a uni no laga hende separa y bo a primiti bo casa fieldad, e hecho aki ta wordo conta como pica, pesey bo ta ripara con bo bida ta bay atras, pasobra aunke con bon bo ta financieramente of den un posicion hopi halto, spiritualmente bo ta morto, aleha for di Dios.
Ta dificil pa hende keda persisti den maldad y keda sin mira e resultado pasobra Dios no ta permiti hende, tene bofon di Dios, tur locual hende sembra nan lo cosecha.
Cos por yega asina leu cu tur cos ta mustra masha bon pafo, pero sin tene cuenta cu malesa ta comiendo pa den, pica no ta haci wega.
Pica no ta cos di chansa cu ne, Rey Saul a purba y a wordo derota. Hende mester arepenti. No tin ningun ganashi den maldad.
