Den Union tin forsa, union ta trece amor, union ta mustra, cu nos ta stima otro, y cu nos ta balora otro, cu nos ta cuida otro, pasobra Dios kier pa nos ta uni den su boluntad, pasobra nos union ta haci Dios contento, pasobra den union Dios ta manda su Bendicion pa nos.
Salmo 133 ta papia di union di rumannan, y tambe di union den Famia.
Un Famia uni tin forsa, mientras cu un famia dividi ta debilita, pasobra nan no por enfrenta ningun situacion.
Union den Famia tin un balor hopi grandi y hopi hende no ta nota esey te ora cu soledad bati na nan porta. Ta facil pa kibra un famia, cu redo, violencia domestico, bruheria,adulterio y divorcio etc .
Pero pa uni un famia bek no ta facil,
Mescos cu Dios ta uni cu su yiu Cristo Hesus , asina ta Su boluntad pa nos por ta uni como un Famia.
Den tur sentido un famia dividi , ta confronta hopi dificultad, den tur area , spiritual , amoroso, financiero, y mas cu tur cos e calor y comprension cu mester existi den Famia.
Un famia dividi no por haci oracion, pasobra pa nos haci oracion, pa otro , ta hopi importante, cu nos por pordona,laga tur cos bieuw keda atras, y reconcilia cu otro pa asina e Spirito santo di Dios por tuma control di nos bida.
Dios den Cristo tabata reconciliando e mundo cu su mes sin tuma nan pika na cuenta E a encarga nos cu e palabra di reconciliacion.
Reconcilia ta nifica cu e mesun sanger cu a wordo derama na Cruz pa abo a wordo derama pa ami tambe, nos ningun no ta mas cu otro dilanti di Dios.
Y hende cu ta discrimina of sinti nan mes mas cu otro no ta reconcilia cu Dios, pasobra nan orguyo ta separa nan for di Dios y hende.
Dios ta stima union, pasobra Dios sa cu caminda tin union, ta dificil pa e enemigo drenta y causa problema pasobra henter famia ta reconcilia cu Dios y nan ta uni, nan ta pordona otro, no tin rechaso, no tin discriminacion, y nan tur por uni den oracion dilanti di Dios sin ningun clase di excuus.
Hopi biaha nos ta mira un cas cu tin 4 auto den cura, y pa bista di hende nos ta kere cu e hende ey tin placa, cu tur yiu tin bon trabao, pesey cada un tin su auto, pero locual nos no sa ta cu orguyo y division ta plama famia for di otro.
Hopi hende tin un cas grandi y luho pero no tin union, no tin paz necesario den cas, pasobra ta falta reconciliacion den e Famia, y sin reconciliacion no tin progreso den ningun aspecto.
Si nos kier mira 2021 como un aña den cual nos lo crece, nos no por keda kibra otro, papia malo di otro, sera porta pa otro, discrimina otro, sigi persigi otro cu calumnia y falsedad, duna otro mal nomber.
Ta imposibel cu bo integridad por subi , papiando malo di bo prohimo, kibrando bo propio Famia, esey no ta e formula pa crecemento. Bo no por tin di trapa hende pa asina mustra cu abo ta bon.
Laga nos uni den nomber di Cristo Hesus y demostra aprecio pa otro den tur momento, pasobra Dios a stima mundo asina tanto cu E a manda su unico yiu pa ken cu kere den Dje no bay perdi ma hanja bida eterna.
E Yiu di Dios no a bin pa condena, pero pa salba, laga nos no cana rond como huzgado, pero como reconciliado, como hende di amor y paz pa asina e mundo por ripara cu nos ta sirbi Cristo y cu nos kier bondad pa tur otro hende.
Y trahando hunto cu E nos ta roga boso pa no ricibi e gracia di Dios en vano , pasobra E ta bisa: Den e tempo aceptabel Mi a scuchabo, y riba e dia di salbacion Mi a yudabo, mira awor ta e tempo aceptabel mira awor ta e dia di salbacion. Galatas Capitulo 6 vers 1+2.
Nos no solamente mester ta papiado pero tambe hacido di e palabra, pasobra pa papia ta facil , pero pa cumpli cu e Palabra ta exigi tempo , dedicacion y disponibilidad. Dios ta usa hende disponible constantemente pa su obra.
Aña 2021 nos mester ta un aña den cual ta wordo demostra e berdadero Dios cu ta biba den nos pasobra hopi ta papia , pero ta poco kier biba den berdadero unidad cu Dios y nan ruman.
Nos ta proclama Paz, Fe, Perserverancia, y un buskeda profundo di nos Rey Y Señor Cristo Hesus.
Maldad ta aumenta riba mundo, hopi mal noticia, hopi hende desepera, pero tambe hopi hende cu mester di Cristo den nan bida.
Laga nos para na banda di Dios y proclama unidad pa medio di su yiu Hesus Cristo.
Sinceramente,
Pastor Marcel Balootje.
