Dios ta nos refugio, nos amparo y nos Fortaleza. Dios ta nos unico recurso, aunke tin hopi hende tin hopi plan den nan cabes , ora e plan no funciona , ta serca Dios mes nos mester bini bek.
Y ta esey ta pasando, mundo ta den un situacion dificil, tur caminda tin keho, di e situacion, pero hopi biaha nos ta keha caminda nos no por haña ayudo, of nos mes ta haci nos caminda largo pa falta di Fe y duda den nos Señor .
Hopi biaha tambe sabiduria ta aparta nos for di Dios, y Dios kier hiba nos na e lugar di arepentimiento, pa asina nos reconoce cu e ta Dios.
Nos tur conoce e historia di e yiu perdi, e mucha cu un dia a lanta y bisa su tata, dunami e parti cu ta coresponde nami, y e tata a yama su ruman , y e tata a reparti e rikesa y e mucha a bay, y beibel ta relata na nos cu e a bay den lugar lew caminda e a gasta tur e placa y a keda blo bashi.
Situacion a dal e asina duro cu e mester a busca trabao, y den e pais cu e tabata, e a haña trabao pa cuida porco.
Hamber a dal e cu e tabata bay come cuminda di porco, pero na e momento ey e a recorda cu na cas di su tata hasta e cria ta come mihor cune.
E a bisa mi ta bay cas di mi tata y mi ta bisa tata, mi a peca contra cielo y abo, mi no ta merece di wordo yama bo yiu.
Pero e tata no a bise nada , pasobra tur dia e tata tabata spera cu e ta bin bek.Pesey e tata a manda pone renchi na su dede ,sapato na su pia , dune paña nobo pa bisti,l. Y manda pa haci fiesta pasobra e yiu cu tabata perdi a bin bek .Lucas Capitulo 15 vers 11 te cu 32.
Nos Dios tur dia ta spera nos bin bek den oracion serca Dje. Ningun hende no por duna Dios un sorpresa.
Dios sa tur cos y e conoce tur situacion, pero e ta permiti e situacion pa wak con nos ta reacciona, sea nos ta hala serca dje, of nos sigi riba nos mes, cu nos orguyo, pensando cu nos ta mas sabi cu Dios, y cu nos por, y cu palabra nan grandi , nos ta bisa cu nos lo logra.
E cos ey a bay for di moda, pasobra poco, poco, tur hende ta ripara cu tur rudia mester dobla y tur lenga confesa cu Cristo ta Señor.
Ta hopi hende ta busacndo di Señor pasobra nan bin nota cu Dios ta Todopoderoso.
Awor tin hende mester pasa manera e yiu perdi, ta te ora nan mira cu no tin ningun salida, e ora ey ta corda riba Dios.
NOS MESTER DI DIOS, ni maske cuanto plan nos tin, of cuanto Proyecto nos tin, pa nos lanta ariba ta esun cu Dios kier esey ta esun cu lo funciona.
Tin 2 tipo di sabiduria, di prome ta bin esun yena cu envidia, arogancia y orguyo, esey ta terenal , narural y diabolico, esey no ta di Dios. E sabiduria cu ta bini di Dios ta puro,despues pasifico,suave y rasonabel, yen di misericordia, y bon fruta,imparcial y sin hipocrecia. Esey ta nifica cu ora nos ta bisa cu nos ta sabi nos mester sa di unda nos sabiduria ta bini. Santiago of Jacobo Capitulo3 vers 13 te cu 18.
Asina nos mester compronde cu tur hende tin mester di Dios. Den tur situacion sea di malesa of finansa, of matrimonio, y Famia nos mester di Dios.
Laga nos dobla nos rudia dilanti di Dios pasobra esun cu aserca Dios lo no keda na berguensa , serca Dios ta ganashi so tin.
Un Feliz weekend den presencia di Dios.
