Un siman yena cu bendicion, ta e deseo pa henter Aruba , Curacao. St Maarten y henter Reino Hulandes.
Inmoralidad ta aumenta di un forma hopi grandi, ya cu den momento di necesidad, hopi ta esnan cu ta laga e muraya di moral cay y ta lubida riba norma y balor. Bijbel ta relata na nos e historia di Job, kende no obstante cu el a perde tur cos , el a keda fiel na Dios. E diabel a pensa cu Job tabata sirbi Dios pa cos, manera hopi hende ta pensa awendia, cu un hende ta sirbi Dios pa locual cu e tin. Job tabata un homber hopi rico, y Satanas a presenta dilanti di Dios y bisa Dios, cu E mester kita e cura cu e tin rond di Job y su propiedad , y asina dune un chens cu Job, y pa wak si Job ta sigui sirbi Dios, ora e ta kibra, ruina y cu malesa. Den e pensamento di diabel, Job tabata sirbi Dios pa locual el a haya di Dios, pero locual e diabel no tabata sa cu Job mes ta PROPIEDAD DI DIOS.
Den e tempo cu nos ta biba aden nos mester ta propiedad di Dios, y demostra cu nos forma di bida, cu nos actitud, cu aki ni se compra, ni se vende, bo caracter y bo integridad, ta e dos yabinan cu ta stabilisa bo hogar den tempo dificil.
Rond mundo ta den necesidad, esey nos sa, p’esey nos mester ta cauteloso, y busca Temor di Dios, den tur cos, cual lo duna nos e sabiduria pa nos cana padilanti den bida.
Bo mester di placa, bo mester come y mantene bo famia, pero tene cuenta for di unda e placa ta bini, pasobra bo por pone las na bo garganta, cu mañan bo no por sali, pasobra hopi oferta ta yega, conociendo bo necesidad, y mañan exigencia ta bay bati na bo porta, pasobra bo a haya, bo a tuma y awor a yega e momento di bo cooperacion, of paga cu fabor cu ta contra ley.
Nos mester ta cauteloso, no ta tur yudansa cu bini na bo porta ta di Dios, e enemigo tambe conoce bo necesidad, y e por disfrasa pa asina bo acepta yudansa y despues e ta kita su mascarada.
Hoben sea cauteloso, no laga ningun hende bisabo nan kier yudabo pasobra bo mayornan ta pasa den necesidad. Si un hende kier yuda, laga e persona ey aserca bo tata, of bo mama pa asina e splica nan e motibo pa cual e kier yuda, pasobra hasta den e tempo aki tin malvado ta hunga rol di bon guy pa despues nan probecha y abusa.
Nos ta propiedad di Dios segun Malaquias 3:17 nos ta yiunan di Dios, y e enemigo sa esey, p’esey e ta cana manera leon y wak ta ken e por devora.
Den e tempo aki, tur locual bo por haci legal extra pa haya un entrada pa bo hogar, hacie. No ta importa cu ta cas bo tin di haci limpi, cana laba baño, chapi cura, laba auto cas pa cas, bende pastechi, bende frio, cose paña, corta mata, traha den cunuco, strica pa diferente cas. Ningun di e cosnan aki a mata ningun hende, ni tampoco ningun hende a cay preso pa haci trabao humilde.
Mantene bo hogar puro, limpi, y santo, no acepta ningun hende den bo cas, bao di pretexto, cu e ta yudabo, mientras cu su bista ta riba bo yiu adolescente, no daña bo nomber y bo testimonio, ni tampoco esun di bo yiunan, no baha bo moral y bo respet pa motibo di necesidad.
No bende bo integridad pa un pida pan. pero confia Dios y E mes lo habri porta pa bo y pone cuminda riba bo mesa.
No bira vicioso, riba locual bo ta haya sin traha y no mara bo mes na hende, pasobra mañan cu Dios kier por bini exigencia cu por pone bo yora. Sigui clama na Dios pa e drecha situacion, y habri porta di trabao pa bo.
Encomenda tur locual bo ta haci den man di Dios y Dios mes lo cuida di bo, manera un tata ta cuida di su yiu.
E tempo ta dificil, pero no laga e tempo, ni tampoco hende domina, influencia bo bida pa bo keda manera un yiu na lechi , cu si nan no yudabo lo bo muri. E husto ta biba pa Fe.
Pone bo Confianza den Dios, pasobra bo ta Propiedad di Dios y Dios lo zorg pa abo y bo famia.
Dios bendiciona bo.
