Durante e celebracion di Manchebo Beach Resort & Spa su empleado di e di cuater trimester, a extende un invitacion na John Fun y Gerrit Griffith di “Ban Uni Man Pa Cria Nos Muchanan” pa asina haci entrega di un check di AWG. 900,- como parti di e esfuersonan comunitario di Manchebo pa 2023.
E donacion mensual di Manchebo n’e programa di desayuno di e fundacion ta conta tambe cu e apoyo di parti di e empleadonan di Manchebo, cu ta uni personalmente n’e causa c’un deduccion mensual di nan salario.
Ademas, e ekipo di yoga di Manchebo a organisa un les special di 101 saludo n’e solo dia prome di januari, cual beneficio tambe lo bay pa “Ban Uni Man pa Cria Nos Muchanan”.
“Ban Uni Man pa Cria Nos Muchanan” ta un Organisacion No Gubernamental (ONG) cu ta duna desayuno n’e muchanan mas necesita den nan respectivo scolnan pa mas di 21 aña. Durante varios aña, Manchebo Beach Resort & Spa a participa activamente cu iniciativa- y contribucionnan boluntario riba ful e isla. E ekipo di Manchebo ta firmemente comprometi di “duna un man.”
