Esaki ta e tema di 2022 pa Dia Internacional di Museo cu ta ser celebra riba 18 di mei. Museonan ta un luga di descubrimento incomparabel, ta educa nos y habri nos mente pa ideanan nobo, y asina contribui na un miho futuro.
E aña aki ta explora e potencial cu museonan tin pa aporta na un cambio positivo den comunidad enfocando riba tres aspecto. E poder pa yega na un comunidad sostenibel, e poder pa inovacion den digitalizacion y acesibilidad y e poder pa fomenta sentido di comunidad pa medio di educacion.
Museonan ta aliado strategico pa un desaroyo sostenibel hunto cu actornan publico, civico y comercial. Atende e retonan cu mundo ta confronta den cuido di medio ambiente y frena cambio di clima ta necesario pa mehora sostenibilidad di cada comunidad. Ciencia tin un papel clave pa distribui informacion riba e temanan concerni. E investigacion academcio di arkeologo Harold Kelly riba con Aruba su habitantenan a atende cu cambio di clima den tempo por yuda garantisa cuminda, awa y bibienda den futuro.
Den e proyecto di MANA, ‘Manteniendo Nos Herencia Bibo Den Tempo,’ ta inclui tecnicanan pa reduci uzo di coriente y promove un medio ambiente di trabou mas sano.
Pa medio di digitalisacion por alcansa y educa publico grandi den un forma directo y efectivo. Museonan tambe ta aplica digitalisacion pa keda relevante y promove acceso na informacion. MANA ta agradecido na Mondriaanfonds di Hulanda cu a subsidia un colaborador pa medionan digital cu lo desaroya un website nobo y tambe desaroya un programa pa su mercadeo digital.
Pa medio di e coleccion y programanan museonan ta contrubui na diferente desaroyo den educacion di comunidad. Door di brinda oportunidad di siña na otronan, museonan ta yuda na forma un sociedad informa y comprometi loke ta fundeshi di democracia di un pais. MANA ta ofrece programanan educativo na scolnan y na e publico general. Educacion continuo di ekipo di MANA ta yuda brinda miho servicio na Aruba. Recientemente arkeologo Raymundo Dijkhoff a termina un curso internacional relaciona cu cuido y conservacion di nos herencia cultural sub-acuatico.
MANA ta felicita tur museo y nan personal na Aruba y rond mundo riba nos Dia Internacional di Museo. Nos ta convenci cu union ta haci forsa y ta crea e poder pa trece e cambionan desea rond mundo.
![](https://24ora.com/wp-content/uploads/2022/05/200217_10150122533473248_7572232_n.jpg)
![](https://24ora.com/wp-content/uploads/2022/05/12027278_754112218048678_7428906591131369_o.jpg)
![](https://24ora.com/wp-content/uploads/2022/05/272073393_4539149432878252_577711127611965196_n-scaled.jpg)
![](https://24ora.com/wp-content/uploads/2022/05/IMG-20211125-WA0030.jpg)