Yegando fin di aña tin hopi cos cu gobierno mester caba di atende. Esaki ta motibo cu minister plenipotenciario di Aruba na Hulanda a yega Aruba pa cumpli cu diferente reunion cu tin planea y pasa e cambio di aña riba su isla.
Guilfred Besaril a bisa cu Hulanda tambe ta pasa den su situacion di reto, y no ta papia di guera. Un periodo cu ta pasa den tanto cos dificil y mester tuma medida pa protege e ciudadanonan, cu kisas nan mes no ta compronde.
Pa loke su funcion na Arubahuis, tambe e situacion a cambia. Tur hende ta custumbra cu como minister plenipotenciario e ta biaha pa Aruba pa duna informacion na e hobennan cu tin pensa di bay Hulanda, pero tambe prome cu nan biaha pa Hulanda. Tur esaki pa evita cu ta bin mucho cambiamento di estudio despues cu nan yega tera friu. Awor tur cos mester a sosode via internet, online, y tin biaha e no ta bay manera debe ser. “E tabata un aña di reto, con planea e yegada di e studiantenan y pa ricibi nan manera semper.”
No ta solamente studiantenan minister plenipotenciario ta atende. Tambe mester mira aspectonan economico, con pa atrae inversionistanan pa Aruba. Tur esaki mester a sosode na momento cu gran parti di Europa tabata den un lockdown despues di luna di maart. “Como gobernante nos tur a siña hopi.”
Aunke cu Hulanda a tuma hopi medida, prome cu esaki caba, el a splica, a nota cu tin hopi demanda pa Aruba. Inclusive tanto TIU como KLM a dicidi aumenta e cantidad di vuelonan. Tin hendenan cu a reserva nan pasashi pa Corsou y despues bula bin Aruba.
2021
Besaril ta mira un prome kwartaal di 2021 hopi dificil ainda pa mundo. Den e prome kwartaal aki tin e vacuna, pero mester mira con e tendencia ta bay ta e prome dos lunanan, prome cu mira con ta sigui resto di aña. Esaki ta necesario pasobra tanto na Aruba como Hulanda a pasa den e situacion cu despues cu e cifranan tabata bou di control, a surgi otro ola di contagio.
E situacion a causa cu ni HORECA nan por a duna un chens, pa motibo cu aglomeracion ta haci cu ta promove e virus. Awo ta pendiente con vacunacion ta bay y poco-poco despues por pronostica con resto di aña ta bay. Den e situacion actual, el a bisa, ni Hulanda cu ta custumbra cu “long term planning” no por a haci esaki. Y mester analisa e situacion per kwartaal.
Arubadag
E celebracion di Arubadag den su forma di antes no ta bay door mas, el a enfatisa. “Esey mi mester bisa cu tur sinceridad. Tur loke ta horeca y aglomeracion ta plat for di luna di april. Y mi no ta premira cu den e prome kwartaal cos lo cambia.”
Pero e celebracion ta tuma luga, di forma diferente. Ta pensando caba riba alternativanan y un di nan ta pa duna algo bek na comunidad.
Asina cu aña habri e lo combersa cu artista- y comerciantenan pa e celebracion aki, pa duna algo na esnan menos afortuna. “Mi lo busca un formula pa na un manera bunita duna algo na comunidad, mas ainda pasobra ta celebrando 35 aña di Status Aparte.”
