Polis no ta confiscando autonan riba caya pa motibo di documento. Lito Lacle, vocero di polis a splica cu tur warda di polis ta yen. Awor aki ta tuma inventario pa dentro di poco pa anuncia na publico kico ta bay haci cu e autonan aki.
Lo bay tin un opendag, caminda cu e doño di auto por mira su auto, pa wak ainda si por yega na una reglo. Si logra esaki, e doño ta haya un periodo mas, si no, e ora lo bay pa deshaci di tur e autonan aki.
Tin yen di accidente tur dia y tur dia tin auto sin seguro riba caya. Segun Lacle, esey ta un problema cu tin internamente, cu awo tin e luho cu a tuma demasiado auto den beslag, mirando cu e diferente controlnan tabata eficiente y efectivo.
Loke ta bezig cun’e, ta tin cu bay deshaci di tur e autonan aki, pa por crea luga pa bay pone mas auto, no solamente na e wardanan, pero na Balashi tambe.
Maneho
Tin di compronde cu den pasado tabata tin un maneho. Si emplea e maneho aki, segun Lacle, por yega na deshaci di e autonan na un manera mas efectivo.
Lacle no tin bista si, kico of con bieu e autonan ta. E inventario lo tin cu bay mustra esaki.
Mester bay bin berdad cu un maneho, caminda cu e auto tin solamente un luna eyden, sino lo tin cu deshaci di dje, pa crea espacio pa otro auto. Si no haci esaki, mirando e controlnan riba caya, lo bay bin cu mas auto aden.
Ministerio Publico
Tin di compronde di Alto Comisario, nan ta bezig cu Ministerio Publico pa tuma decisionnan, of pasonan pa deshaci di autonan cu tin tanto tempo para den cura. Dentro di poco lo bay mira e medidanan cu lo bay wordo tuma.
Awor aki probablemente hopi di e autonan aki lo wordo distrui, si nan no wordo reclama. Riba dje tin mas cu 100 brommer.
Segun Lacle, pa cada vehiculo ta 25 florin pa dia. E lo bay costa mas placa compara e balor di e vehiculo. Probablemente tin cu deshaci di hopi brommer y auto.
Hopi di e motibonan pakico e conductornan no ta busca e auto, ta e pago. Dado momento nan no por yega na e placa pa por paga esaki.
Sa cu mando policial a cuminsa cu esaki y dentro di poco lo bay cuminsa deshaci di e autonan.
Autonan sin seguro y nummerplaat
Cuerpo Policial, e ta haci dolor cu ta mira cu un hende bay cu un auto sin su papelnan. Pesey tin cu yega na un medida mas pronto posibel. Mando policial a priminti cu dentro di poco medidanan ta wordo tuma.
Control
Nos ta yegando e temporada druk di fin di aña. E controlnan riba caya lo bay sigui. Tin cu busca un solucion pa autonan cu no por ta riba caya. Loke si por garantisa cu e controlnan lo continua.
Si mira bon, tin un motor unit tur fin di siman ta bezig y ta hayando resultadonan basta positivo. Tin control den tur districto y boetnan ta wordo reparti.
Advertencianan preventivo
Un cos ta sigur, cu e papelnan mester ta na ordo. Pa seguro so, e por ta por lo menos 600 florin pa paga. Si ta costabo 300 pa page, pone den balans. Paga bo seguro di auto pa bo core riba caminda.
Accidente
Loke ta resalta den e dalmentonan, aanrijding cu hit & run a subi bastante. Probablemente e tin di haber cu papelnan no ta na ordo. Esaki ta segun informacion di e departamento concerni.
Coremento sin rijbewijs
No tin un rijbewijs, ta un delito. Consecuentemente door cu ta un delito por bay over na detenebo. Ese ta un di articulonan caminda coremento sin rijbewijs ta menciona aden.
Polisnan ta aplicando e ley manera mester ta. Nan ta mas ekipa na conocemento pa nan sa kico nan por haci, kico nan derecho y potestad ta. Awor aki, si no tin rijbewijs, ta miho bo keda sin core auto.
E posibilidad ta grandi cu bo ta wordo deteni y treci warda, presenta dilanti fiscal auxiliar, cu tur e consecuencia cu e ta bin cun’e, Lacle a splica.
