Diahuebs mainta durante un rueda di prensa e conocido cantante Levi Silvanie hunto cu One Happy Bowl (OHB) a anuncia e detayenan di Aruba su prome festival di salud. E festival ta hiba e nomber di ‘One Healthy Day’ y lo tuma luga dia 20 di maart 2022.
Mirando cu mundo completo ta pasando den momento cu diferente desafio incluyendo nos islanan ABC, ta importante pa stimula salud fisico y mental. Esaki ta netamente un di e obhetivonan pa e proyecto di ‘One Healthy Day’. E organisadonan kier uni, inspira y activa nos comunidadnan pa ta mas consciente y pro-activo pa nan salud.
‘One Healthy Day’ ta un festival di un dia cu kier inclui tur persona riba nos isla di Aruba. Ora cu ta papia di ‘tur persona’ no ta referi na solamente edad of sexo pero tambe na nivel di salud y/of habilidad fisico. Cu esaki por imagina cu lo tin algo pa tur hende por participa y na nan nivel. Tambe por imagina actividad manera hiking, yoga, bailamento, deporte den ekipo, bootcamps y mucho mas. E actividadnan lo cuminsa for di 5:00 am y sigui te cu 10:00 pm rond di Aruba.
E concepto ta cu tur rond di nos isla lo tin diferente actividad deportivo cu lo tuma luga simultaneamente. E parti mas interesante di e dia aki ta cu tur e actividadnan, workshops etc. lo ta completamente gratis. E idea ta pa di e forma aki promove un estilo di bida saludabel. Naturalmente lo tin un enfoke tambe riba e parti di cuminda. Pa asina educa e comunidad riba e importancia di come saludabel. Lo comunica cu e restaurantnan pa e dia aki prepara un menu special cu enfoke riba salud.
E deseo di e organisacionnan Levi Silvanie y One Happy Bowl ta pa famianan hunto por explora e diferente organisacion, deporte y otro iniciativa cu Aruba ta ofrece pa asina por biba un bida mas den balans.
Naturalmente kico ta un festival sin musica y entretenimento. ‘One Healthy Day’ lo bay presenta un programa amplio tambe di esaki.
Pa mas informacion por bishita e website via www.onehealthydayaruba.com of via instagram.com/onehealthyyouaruba
