Aunke e tabata parti di e coalicion MEP-POR-RED na su inicio, awendia e ta cu Accion 21 y no necesariamente ta di acuerdo cu tur proyecto anuncia pa e coalicion. Port City cu Aruba Ports Authority kier bin cu ne pa desaroya hotel, casino, shopping malls y casnan riba tereno di waf, no ta suficiente transparente ainda y riba dje, no por start bou di un gobierno demisionario. Daphne Lejuez a manda haci pregunta na Minister Dangui Oduber riba su intencionnan cu e proyecto.
E idea di un Port City a cuminsa di tempo di Minister Glenbert Croes den Gabinete Eman durante coalicion AVP-OLA na 1997. Cu tempo Minister Eddie Briesen a sigui cu ne y a atrae e inversionista Namdar, pero a resulta den investigacion pa falta di integridad. Awo ta Minister Dangui Oduber ta promoviendo e proyecto. Den 4 aña no a keda cla, pero awo kier ehecut’e pa e por start e aña’ki ainda.
Recientemente Minister Dangui Oduber (MEP) a anuncia cu ta bayendo destaho publico cu e proyecto di Port City. Ta trata aki di un inversion di como 500 miyon dollar for di sector priva den un masterplan di entre 10 pa 15 aña, cu lo embeyece y desaroya henter e area di waf y Oranjestad. E minister a bisa di a manda invitacion pa inversionistanan interesa por participa den e destaho aki.
“Mientras berdad esaki por ta un bunita proyecto, tin hopi pregunta sin contesta te awe mirando cu lo kier pone 2 hotel, vivienda y espacio comercial den e area aki di 2-3 piso”, asina parlamentario independiente Daphne Lejuez a duna di conoce.
E tin varios pregunta riba e proyecto ambicioso aki, manera si a haci un estudio di impacto socio-economico pa e proyecto aki. Tambe si a considera un plan di trafico, mirando e cantidad di persona cu lo tin solamente L.G. Smith Blvd como entrada y salida, ya cu e otro banda ta waf/lama. E parlamentario kier sa con lo resolve e stagnacion di trafico riba boulevard. Y si e intencion ta pa nan por bira vivienda pa local – con lo percura cu e prijs pa por biba aki lo keda faborabel pa nos hendenan por biba aki? Of acaso e lo ta un proyecto pa crea mas vivienda pa turista so?
“Pues esaki ta apenas algun pregunta cu te ainda no a haya contesta y pueblo tin derecho di sa prome cu sigui cu esaki y ta mucho menos un decision cu lo por keda tuma pa un gobierno demisionario. Transparencia ta crea confiansa”, asina e politico cu lo bay eleccion riba lista di Accion 21 a duna di conoce.
Mester menciona cu tin varios pregunta riba integridad di e proyecto, specialmente ora cu varios comerciante yega na e gobierno aki, cu tabata miembro di e Hunta di Supervision, a tuma nan retiro pa asina por participa tambe den e proceso di destaho. E ta duna indicacion cu, awo cu a prepara e “framework” pa e proyecto y cu nan tin tur informacion di e plannan, cu nan mes ta participa tambe den dje. Pero caida di gobierno den forma abrupto a cambia plannan existente y awo kier purba di tur forma pa toch pusha e proyecto, aunke gobierno ta demisionario desde dia 30 di maart 2021.
No solamente Daphne Lejuez, pasobra parlamentario Mike de Meza tambe a adverti directornan di companianan estatal pa abstene di sigui ordo di un gobierno demisionario. A corda nan cu cada un ta personalmente responsabel pa nan decisionnan y cu despues, nan lo tin cu responde na cualkier investigacion penal cu lo por inicia pa verifica vericidad y transparencia den tumamento di decision sin cu tabatin conflicto di interes!
