L’America Gallery, ta conmemora esnan cu a fayece di COVID-19 na Aruba. Ta pesey nan a bin cu Aruba Corona Casualties Wall pa esunnan cu a perde nan ser stima door di e virus mortal aki.
Erik van Droogenbroek, propietario di Better Homes y L’America Gallery, ta conta cu e iniciativa a cuminsa na momento cu nan tabata trahando leishi pa cliente. Ora cu nan traha e cuadranan, semper ta resta pida leishi.
Na momento cu e pandemia di COVID a cuminsa, a pensa cu nan tin asina tanto leishi, pa ofrece esunnan cu a perde nan ser stima door di COVID, un leishi gratis cu potret di nan ser keri aden.
A pone algun propaganda den medionan di prensa y a cuminsa cu e iniciativa aki. Papiando cu hopi hende riba e proyecto aki, a mira cu toch ta basta hende cu a fayece door di COVID, por a mira den corant, cu no a skirbi casi nada riba e persona fayeci.
Tin biaha tin cu busca kico a pasa, cuanto hende a fayece, etc. Kier a duna un tiki mas atencion na e situacion aki. A dicidi di reserva un muraya den e galeria, kita tur cuadra y pone un borchi, djey pa cuminsa pone leisji bashi cu e fechanan di esunnan cu a fayece door di COVID.
A cuminsa na 2020 cu un cuadra chikito. Pero e pandemia a hit Aruba duro, mirando cu riba e muraya tin 66 leisji, di esnan cu a fayece.
L’America Gallery ta ofrece e famia di esunnan cu a fayece, un leishi y por pone potret di nan ser keri riba e muraya como homenahe. E prome cliente a bin y a mira e muraya. El a trece potret di su omo cu a fayece. E idea ta pa mas hende haci uzo di esaki unda cu nan por tin un luga den e galeria unda cu por conmemora un rato.
Tur loke mester haci ta bin cu un potret di e ser keri cu a fayece durante COVID y e fecha cu e persona a fayece. E ora ta hinc’e den leishi. Si bin cu un potret por hinc’e den leishi. Si no ta desea pa pone riba e muraya, por haya e servicio pa hinc’e den leishi y hib’e cas.
Pa mas informacion semper por tuma contacto cu L’America Gallery na 5830800 of whatsapp 5661668 of pasa personalmente den Italiestraat 24-A (net patras di Crown Boulevard) di dialuna pa diabierna, for di 8:00 am pa 5:00 pm.
