Mientras cu na nos isla ruman Corsou ta experenciando mal tempo, aki na Aruba, ora a haci e pregunta ey, kico ta nos situacion di tempo, tur cos tabata ‘muisstil’, ningun hende no sa di nada.
Algun ciudadano a tuma contacto cu nos mesa di redaccion p’asina informa cu n’e parti pazuid di Aruba, den e area di Zeewijk, lama halto a subi tera.
E habitantenan di Zeewijk y otro ciudadano sa haci uzo di e area, por ehempel pa pisca of simplemente pa disfruta di e brisa. Ya for di atardi a cuminsa tuma nota di awa cu tabata subi tera.
No ta trata den e area aki so, sinembargo mas parti pabao di Zeewijk tambe, net prome cu yega na un birada skerpi pa bin ariba riba e caminda aki mes, tambe por a tuma nota cu awa a subi caminda.
Manera ya indica caba den e articulo aki, a tuma contacto cu Departamento Meteorologico, pero no a sa di duna un contesta pakico e fenomeno aki.
MIENTRASTANTO NA CORSOU
Mientrastanto na Corsou, e mal tempo cu lamper y strena, ta acercando Corsou gradualmente y a activa mas ainda. Probablemente e yega na mas parti di e isla.
Manera cu por a mira riba Facebook, awasero tabata cay na un manera basta pisa y cu biento basta fuerte direccion zuid of zuidwest.
