Den tur cas, mayornan mester por haci oracion un pa otro, den presencia di nan yiunan, pa asina e yuinan por mira y sa cu esey ta bon y si e muchanan puntra dicon Mami y Papi ta haci oracion pa otro e contesta ta, pasobra esey ta mandato di Dios.
Santiago capitulo 5 vers 16 ta bisa: Pesey confesa boso picanan un na otro y haci oracion un pa otro, pa boso wordo cura. E oracion efectivo di un hende husto por logra hopi.
Asina cu den un cas, mayornan no por haci oracion cara cu cara un pa otro, tin un problema, sea nan no sa, of nan no kier, of nan no tin temor di Dios, of nan curazon ta lew di Dios y mester acepta Hesus Cristo como Señor y Salbador y nan yuinan tambe .
Ta tempo pa papia cla, pasobra e binida di Cristo ta serca y e excuus di bisa mi no ta cla a bay for di moda, mayan no ta priminti na ningun hende. Ta tristo pa mira rond mundo, con hende ta cla pa tur clase di idolatria cu ta hiba na inmoralidad ( Efesionan 5 v 3-7) , pero ora yega e momento pa entrega bida na Dios, nan no ta cla pe. Hende kier biba cu ausencia di Dios den nan bida.
Si den un edificio caminda hende ta bay tur dia den siman y tambe riba diadomingo pa ricibi cuminda spiritual , un hende no por bira cara pa e persona cu ta para banda di dje y haci un oracion di profundo di su curason pe, tin hopi cos cu no ta bon , nos mester bay bek na arepenti y converti. E palabra di Dios ta bisa cu e oracion di e husto por hopi. Ki ora nos ta husto?Palabra di Dios ta siña nos den Juan 3:16 con nos por yega na e husticia di Dios, pasobra pa gracia nos ta salba (Efesionan 2 v 8+9) y e morto di Cristo Hesus na Cruz a hustifica nos tur den Su Sanger. Pesey ta hopi importante pa bo kere den Hesus Cristo ( Juan 3 v17+18).
Santiago capitulo 1:8 ta papia di e persona di dobbel animo, y Revelacion capitulo 3 vers 16 ta confirma esey seriamente.Un hende no por biba dos bida, un hende no por sirbi dos Dios.(Mateo 6:24).
Imaginabo bo ta haci oracion na cas pero ora bo yega trabao, bo ta bira completamente un otro persona, yena cu falsedad y dobbel pensamento, siendo compinche di esnan cu ta haci malo, y asina agrada hende y lubida riba Dios. ( Isaias capitulo 55:6-8). Ta dos caminda tin pero ta den un bo por cana , sea bo ta biba pa Dios,(Romanos 12 v 1+2 ) Miqueas 6 v 8) of bo ta biba den pica ( Galationan 5:19-21).
Ta iresponsabel pa un hende ta biba dos bida pasobra e persona ey no ta firme, ni den obra ni den pensamento. Pesey e palabra di Dios ta bisa den Santiago 1 vers 7+8 cu no laga un persona asina spera cu e ta ricibi algo di Señor siendo un persona di curazon dobbel y inconstante den tur su camindanan.
Un biba dobbel ta causante di Depresion, Ansiedad, Problema cu comemento,Problema cu presion, y tur esaki por conduci na e conocido problema di salud mental. Hopi hende ta keha malo pero poco ta expresa ki tipo di bida nan ta bibando..
No ta por nada nos ta roga pa den tur cas di famia, tur hende haci oracion un pa otro y reconcilia cu otro, pa asina paz, santidad y salud por reina. Pastor Marcel Balootje.
