Diasabra mainta pa mas o menos 9:30 am, a acudi na Welcome Plaza, un sitio di cua e obhetivo ta pa yama bonbini na nos turistanan. Aki nan por haci compra di un souvenir of cualkier otro obsekio pa hiba bek como recuerdo di nan bishita na Aruba. Sinembargo, den e ultimo tempo constantemente tin cu bati alarma y pidi ayudo di autoridad debi cu ladron y antisocial ta realisa un cantidad di robo eynan. Nan ta kibra e rolluik, lagando daño atras pa esunnan cu ta traha incansablemente pa promove nos turismo y pa pone pan riba nan mesa dia aden, dia afo.
Ta sospecha cu ta adicto ambulante of algun hoben cu kisas ta move den e vecindario cu bicicleta, kibrando propiedad di e doñonan di e kiosconan aki. Awe mainta atrobe tabatin un caso asina. Doño di un dje kiosconan a acudi na sitio mainta p’e habri su luga y labora y a bin topa cu e rolluik di su kiosco kibra. Pues, atrobe a experiencia vandalismo y el a conta cu e ta cansa di e situacion. “Nos ta hopi cansa, cada rato e muchanan, e hendenan ta pasa cu bicicleta, pasa bin pidi cen, molestia e turistanan”, el a lamenta.
El a referi dibiaha tambe na e echo cu nan no tin ni un baño drechi cu nan por haci uzo di dje y fuera di esey, ta haya nan mes confronta cu tipo di situacion lamentabel asina aki. Te ainda, e no a habri su luga pa mira precisamente kico tur a bay cu ne. El a cualifica e situacion como uno tristo pa nan cu ta traha duro eybanda.
Ta apenas algun dia pasa, a horta den un otro kiosco eybanda, net awo cu esunnan cu ta traha p’e sector turistico a cuminsa lanta cabes bek. Pues, sigur ta di lamenta e echo aki, mirando cu no tin ningun personal di siguridad eynan pa proteha e kiosconan tampoco. A haci un peticion na autoridad pa bay investiga unda e anti-socialnan aki ta bendiendo e obhetonan cu nan ta horta for di e kiosconan.
