Camara di Comercio ta haya cu bahamento di gasto di gobierno ta den un bon direccion. Segun Kawish Missier, si mira e placa cu nan ta spaar y e total riba e presupuesto, por mira cu ta un porcentahe hopi chikito cu nan a spaar.
Segun KvK mester bin pasonan hopi mas grandi, pa asina dirigi e pais den otro direccion, cual ta e direccion di baha e gastonan drasticamente, paga bek e debe, pa asina nos como comunidad y como negoshante por paga menos belasting.
Esey, hopi biaha nan ta bisa cu nan ta bay ahusta e belasting y e cosnan ta bira mas caro, pero ta di opinion cu gobierno awo si tin cu baha nan gastonan, pasobra e situacion con e ta actualmente, comerciantenan no por carga ningun ahustacion di prijs, si e ta subi.
Missier a enfatisa cu gobierno mester baha nan gastonan drasticamente. Nos ta den un situacion unda cu e debe nacional di Aruba ta entre 90 y 100% di e GDP. Si conta e PPP project, ta riba 100% y esey ta un situacion cu den opinion di Camara di Comercio no ta saludabel. Kier preveni pa e sigui subi.
Unico manera pa e debe no subi, ta pa nos como pais, genera mas placa cu nos ta gasta. Eynan tin cu traha hunto y wak kico ta e oportunidadnan di enbes bay den un deficit, crea un surplus pa paga bek e debe.
Segun Misier, tin cu bin cu solucionnan cu ta hopi mas innovativo y haci’e cu un bon investigacion. E mester ta bon planea tambe. Tin cosnan cu ta mira cu ta hopi ad hoc na e momento, pero e vision cu Camara di Comercio tin, mester ta mas integral den un meerjarenbegroting unda cu e gobierno ta mustra cu di berdad nan tin un bon plan pa drecha e situacion financiero di e pais aki.
