Kustwacht a intercepta un boto local cu a bay busca dos Arubiano pega na Venezuela y a resulta cu un di nan ta busca husticia, relaciona cu un caso di atraco.
Pa algun tempo caba tin basta Arubiano pega na Venezuela. E Arubianonan aki ta desespera. Aunke mas cu un aña pasa gobierno a adverti nan pa no bay Venezuela, asina mes varios a bay y awe ta pega eybou.
Awor cu e problema di Covid-19 kier benta e problema aki den scochi di gobierno pasobra nan no por yega Aruba. Kier pa gobierno move shelo y tera pa nan por bin Aruba. Riba nivel diplomatico esaki ta masha dificil. No ta logrando ni pa saca e Venezolanonan pega na Aruba. Corda pa logra trece e otro bek. E realidad ta cu awor aki no mag trece ningun hende. Bo por wordo persigui a base di e decreto cu tin pa cu fronteranan mirando Covid-19. Asina mes e desesperacion di algun Arubiano pega na Venezuela a causa cu nan a busca manera di bolbe Aruba.
Kustwacht a anuncia cu nan ta controlando masha pisa mes ultimo temponan aki. Diahuebs cu a pasa mes nan a anuncia extra control. Riba tur embarcacion nan tin wowo extra. E boto di Aruba “Uno Mas” a sali diadomingo bay zuid. A yega net na rand di awa Venezolano. Eynan a topa cu un boto Venezolano. E boto Venezolano a sali pa bin trece hende di Aruba cerca e boto “Uno Mas”.
E dos personanan cu el a bay busca tabata e homber N.N. y tambe e homber Ivan Quandt. Ora cu nan tabata biniendo bek nan a haya Kustwacht riba nan. A acercanan mesora y obliganan drenta waf di Barcadera. Eynan e control a cuminsa riba e trip pa topa otro boto y tuma hende over. Aki no ta papia di mensen smokkel pero si ta papia aki di violacion di un decreto di gobierno relaciona cu fronteranan basa riba Coronavirus.
E homber N.N. no a keda deteni. E homber Ivan Quandt ora cu a bay atende cu ne den e sistema di Migracion a resulta cu husticia tabata mester di dje. E ta un sospechoso di atraco riba Joyeria. El a huy cu tur e joyasnan bay Venezuela y te awe a bolbe bek Aruba cu boto den un forma clandestino. A detene y pase over mesora na Atraco Team. Otronan envolvi den e caso di atraco ta sintando castigo. Tabata falta Ivan Quandt so. Awor cu a trip ilegal cu e boto “Uno Mas” e sospechoso busca a keda deteni na su yegada na waf di Barcadera.
