El a hiba un lucha fuerte y largo contra cancer. El a gana diferente bataya pero finalmente e enfermedad a gana e guera. No obstante cu su curpa tabata bayendo atras, Glenn de Windt a keda positivo y cu un ambicion pa cura y bira bon. Aña pasa ainda a promov’e comp sub-inspector primera clase den Cuerpo Policial Aruba. Awe merdia el a fayece memey di su famia.
Pa algun aña y te na ultimo el a dirigi e departamento di Bureau Criminele Inlichtingen (BCI), cu ta asina tanto den noticia. Nan ta un unidad di polis cu ta traha cu informacion di inteligencia criminal.
Glenn de Windt ta casa y ta tata di tres yiu, di cual un di nan ta studiando pa polis tambe. E ta bay laga su nietonan tambe atras.
E tabata un polis masha stima entre su coleganan. Por lo menos un colega, Lito Lacle, a skirbi riba su pagina di Facebook cu: “Rest in peace mi ruman stima. The Z Team a perde otro fighter cu ni se compra ni se vende. Awe bo no ta sufri mas, bo ta cerca bo dos tatanan. Semper Lu tabata den bo oracion y abo den di mi. Bo positivismo, a pesar di bo malesa, tabata increibel. CID-er forever. Forsa na famia”.
Di acuerdo cu protocol, ta baha tur bandera na wardanan di polis na “halfstok” pa anuncia cu nan ta di luto. Tur evento di celebracion tambe ta posponi te despues di e entiero oficial cu tur ceremonia protocolario. Cu Glenn de Windt sosega na paz.
