Kòrsou lo ta anfitrion pa e siguiente reunion di direktiva de AICESIS, e organisashon internashonal di konsehonan sosio ekonómiko i institushonnan similar.
Representantenan di diesocho pais di kuater kontinente lo reuní tokante di e tema ‘e impakto di e revolushon digital riba e futuro di humanidat’ i tokante di e programa di mas aña di e organisashon internashonal aki.
Representantenan di e Organisashon Internashonal di asuntunan di Labor, ILO, i e Konseho Ekonómiko i Sosial (ECOSOC) di Nashonnan Uní lo tei presente na e reunion aki komo opservadó.
Esaki ta un di resultadonan di e reunion general di direktiva di AICESIS ku a tuma lugá dianan 17 i 18 di sèptèmber último na e konseho sosio ekonómiko nashonal di Fransia (CESE) na Paris.
E delegashon tékniko di e Konseho Sosio Ekonómiko di Kòrsou, ku a konsistí di e direktor/sekretario general Raùl Henriquez i e konsehero mayó Miloushka Sboui-Racamy, a asistí na e reunion ariba menshoná komo miembro di AICESIS, komo miembro di direktiva di AICESIS i tambe komo Sekretario general suplente di AICESIS pa Latino Amérika i Caribe.
Den e funshon último menshoná e delegashon di SER Kòrsou, riba petishon di e presidente di AICESIS i e Sekretario General di AICESIS, a tene un presentashon tokante di e funshonamentu di e konsehonan sosio ekonómiko den region, e manera ku nan ta kontribuí na e adelanto di e diálogo sosial i e diskushon sosial ku nan ta krea pa ku e tema ‘e konsekuensianan di e revolushon digital’. Durante di e presentashon, ku tabata basa riba un investigashon den region hasi pa SER Kòrsou, a bai mas den detaye den e faltanan/fayonan (konsehonan ku no ta funshoná) i e desafionan den region ku ta stroba e funshonamentu di sierto di e konsehonan sosio ekonómiko, manera instabilidat polítiko i falta di fondo. Tantu e investigashon komo e presentashon a haña bon akohida i nan por sirbi komo ehèmpel pa e otro regionnan.
Den e direktiva aktual di AICESIS tin diferente region representá. E direktiva aktual ta konsistí di konsehonan sosio ekonómiko di Benin, Kosta di Marfil, Guinea, Maroko, Senegal, Mali, Brasil, Kòrsou, Repúblika Dominikana, China, Sur Korea, Rusia, Spaña, Fransia, Luxemburgo, Hulanda i Rumania. E presidente ta señor M. Iacob Baciu (SER Rumania). Señor Francisco Gonzales de Lena (SER Spaña) tin e funshon di Sekretario-general.
Na komienso di mart 2019 representantenan di e konsehonan sosio ekonómiko aki lo ta presente na Kòrsou, huntu ku e opservadornan di ILO i ECOSOC, pa kontinuá e debate tokante di e tema ya menshoná i pa kompartí e “best practices”/mihó práktikanan tokante di e tema aki.
