Fin di siman ultimo riba diasabra na Filomena College San Nicolas, Kiwanis San Nicolas a organisa un tremendo evento educativo pa hende muhe hoben. Giandra de Cuba, president di Kiwanis Club of San Nicolas ta conta nos cu diasabra tabata e di tres edicion di programa Raising Princeses into Queens. Un grupo di 75 damitas a bini pa haya informacion riba e topico di ‘self love-self care- self respect, it starts with you’ cu diferente oradornan presente kende a trata e topico cu e hobennan.
“Nos ta wak cu e topiconan ta un necesidad den comunidad, den e hobennan, specialmente mirando tur e informacion cu ta bini via social media, e presion cu e damitas ta haya nan mes awor. Creando diferente emocionnan, e parti di salud mental tambe ta hunga un rol,” segun de Cuba. Dus e intencion tabata pa trece e damas hunto pa haya informacion riba diferente area, pa nan tin informacion corecto y abilidad di por papia habri cu personanan cu nan por confia tambe.
“Esaki ta mi di dos biaha akinan y mi ta hay’e hopi leuk pasobra tur mucha ta bini hunto, bo por sign-up y haya diferente tayer. Bo ta siña mas cos nobo y pa bo stima bo mes, y cuida bo mes,” segun Ashlynne Franken, un hoben participante ta bisa nos. E proyecto a nace for di inspiracion riba e necesidad di hende muhe cu ta miembro di Kiwanis SN a mira, con mester podera e hende muhe.
Tur aña den luna di maart tin e celebracion riba dia internacional di hende muhe (riba 8 di maart) y Kiwanis SN a dicidi di haci evento pa mucha muhe entre 12-17 aña di edad prome cu e dia pa asina por no solamente ricibi pero tambe duna y inverti den e futuro di mañan.
E proyecto ta desaroyando hopi bunita y cada aña ta yena esaki hopi mas lihe. E aña aki el a yena den menos di binti cuater ora y esey ta demostra e necesidad, como tambe e entusiasmo cu tin den e hoben pa e proyecto aki. “E ta duna nos un satisfaccion enorme di por pone un proyecto asina ariba pia pa nan.”
Gedis Janes, Aruba su Reina Grandi di Carnaval 70 tambe a haya invitacion pa duna un charla tocante su participacion como Reina y despues pa duna motivacion riba pa kico ta importante pa kere den bo mes pa yega leu den bida. “Mi ta kere e prome cos cu bo tin cu haci ora bo lanta mainta ta duna bo mes un pep-talk riba con bo ta logra tur loke bo kier den bida. Esey p’ami ta algo cu mester ta primordial den tur hende su rutina diario,” Gedis ta bisa.
Kiwanis SN kier a gradici Louvre y Swift Distribution cu a yuda nan haci e dia aki posibel.
