Riba e skina di custumber, entre Adriaan Lacle Boulevard y LG Smith Boulevard, Kiwanis Club of Palm Beach ta preparando pa lanta su tent di cuminda, pa asina nan por recauda fondo pa sigui yuda den comunidad.
Cheito Croes a splica e grupo di Kiwanis Club of Palm Beach y tur su miembronan ta for di mainta tempran, preparando pa lanta e tent y cuminsa bende cuminda y bebida, durante e diferente paradanan cu lo bay tin den e periodo di Carnaval.
E parti bon ta cu tin e parada di mucha bek un biaha mas. Den añanan anterior e ta bira na e skina riba Adriaan Lacle Boulevard. E aña aki e ta pasa bay dilanti di e tent di Kiwanis riba LG Smith Boulevard. Esey ta haci cu nan ta habri un dia mas.
Asina ey nan por genera mas fondo pa duna bek na comunidad. E paradanan cu lo bay ta habri ta parada di mucha. Lo cuminsa for di tempran, 10 pa 11’or lo ta habri te ora cu e parada caba, of ora cuminda caba of te ora cu e hendenan bay cas.
Despues tin lighting parade, cual ta diasabra 23 di Februari. For di 6’or di atardi nan ta habri te cu anochi laat.
Despues tin e parada di San Nicolas. Naturalmente nan no ta habri ora cu San Nicolas cuminsa. Pero pa ora e caba, banda di 6’or di atardi, nan ta habri. Ora cu e parada caba por bin abao, refresca e curpa, dal e tremendo cumindanan cu nan tin, cual ta entre otro, keri keri, pan cu sate, sopi oester.
Naturalmente nan lo ta habri durante parada grandi. E parada lo cuminsa pa 10’or. Esey ta nifica cu ya pa 9’or nan ta habri pa tur esnan cu kier un desayuno mainta.
Hopi aña
Kiwanis tin mas cu 20 aña cu nan tin nan tent di cuminda. Ta un caminda cu no solamente nan ta bende diferente producto pa esnan cu mester di algo di come, algo di bebe. Alabes ta un momento caminda tur e miembronan ta bin y traha hunto. E hermandad tambe ta importante y tur ta voluntario. No ta cobra ningun cen y ta haci’e cu yen di amor. Ta yega eynan riba un diasabra mainta. Ta lantando e tent den dos fin di siman. Otro siman nan lo bin bek hunto pa caba cu tur e trabaonan.
Segun Croes, ta cuminsa bende pa 10’or, pero for di 8’or di mainta tin hende caba ta cuminsa prepara e tent, corta pan, busca cuminda. Tur esaki nan ta haci voluntariamente y cu hopi smaak.
Donacion
Loke ta carni y galiña, nan mes ta cumpra. Nan ta haya algun descuento special, danki na e comerciantenan cu ta sostene e vision di Kiwanis Club of Palm Beach. Pero Papiamento Restaurant ta prepara e cumindanan. Esey si ta un donacion na e club. Nan ta prepara tur cos. E sopi di Oester, e keri keri, e pan cu sate y asina por sigui menciona. Danki na nan, tur aña nan ta cu Kiwanis y nan ta hopi gradicido. Esey ta yuda, pasobra menos e gastonan ta, mas nan por duna bek na e proyectonan cu nan ta haci durante aña y duna bek na Aruba.
Inversion
Aña pasa a duna bek casi 270 mil florin. Nan tin diferente proyecto entre otro Watercooler project, caminda cu a haci un donacion di mas di 30 watercooler na diferente organisacion y tambe 20 scol.
A relanza e proyecto di childseat. A lansa un video riba social media pa esaki. Riba piso di hospital a yuda mas cu 30 mil florin. Nan tabata falta cierto ekiponan y a yuda cu esey. Kiwanis tin diferente programa na scolnan basico, entre otro na St. Dominicus y Franciscus College. Nan tin diferente otro programa na scolnan secundario. Nan ta haci donacion na mas di 30 organisacion cu ta pidi fondo. Tur esey ta danki na esnan cu ta contribui, no solamente na Masquerade, pero tambe esnan cu ta cumpra un pan. Esaki no ta un ganashi. Tur loke nan ta haya ta bay directamente den comunidad.
Masquerade Ball
E benta di Masquerade Ball ta bayendo hopi bon y ya entradanan ta limita. Prome cu otro siman por canta sold out caba, cual ta cuater siman prome cu e fiesta. Nan ta contento no solamente cu e lo bay ta un exito pa e hendenan bay, pero ta yuda comunidad. Kiwanis tin diferente otro proyecto pa e aña aki y e añanan cu ta bin y sigur, nan ta contento.
