Recientemente, Kiwanis Club of Aruba a participa den e prome edicion “Global Money week” Aruba cu ta parti di e plataforma internacional di Global Money Week, cu ta un evento educacional cu ta tuma lugar mundialmente cada aña na luna di maart. Pa un siman largo alrededor di 700 mucha di diferente scol basico a participa na e evento, cu a enfoca riba educacion y conscientisacion den e area financiero.
E meta tabata pa educa nos futuro generacion den un manera interactivo di e diferente areanan di placa: con pa traha placa, con pa spaar placa, con pa uza placa na un manera responsabel y con pa duna bek na e comunidad. E speurtocht tabata pasa door di e cayanan di San Nicolas y e muchanan tabatin e oportunidad pa bishita e 6 stacionnan, esta “Learn, Earn, Save, Spend, Share y Innovate”. Na final di e ruta e muchanan a ricibi nan “tesoro”, y a siña varios les importante di placa y tambe di reciclahe. E stacion di duna bek na comunidad tabata e penultimo parada di e speurtocht aki y ta unda Kiwanis Club of Aruba, Banco di Caribe y e studiantenan di Colegio San Nicolas, a siña e muchanan e importancia pa duna bek na e comunidad di Aruba y con pa traha hunto den ekipo pa asina logra nan meta y propositonan.
E muchanan a participa na 2 wega popular y na final e grupo ganador a ricibi 2 premio, cual tabata un popchi cu a keda pa nan y e otro premio tabata un moneda. Esaki e muchanan por a deposita den un caha secreto pa e organisacion cu nan ta desea di haci e donacion despues di a ricibi un breve informacion di Paralympics, YMCA y Casa Cuna. Na final di e siman di e Global Money Week Aruba lo haci donacion na e instancianan menciona.
Pa fomenta educacion financiero na Aruba, un team grandi di socio a bini hunto y a traha pa simannan largo pa haci e proyecto aki posibel, y lansa e prome edicion di Global Money Week Aruba esta; Banco Central di Aruba (BCA) hunto cu Kids Council Aruba, Gobierno di Aruba ( IDEA & FUTURA), Aruba Bank, Banco di Caribe, Caribbean Mercantile Bank, CIBC First Caribbean, RBC, Guardian Group y Qredits.
