Den fin di siman partido RED a tene reunion di miembrecia, pa di 17 aña unda a duna relato y a vota pa e directiva nobo.
E reunion aki a tuma luga di forma virtual, segun Armando (Rudy) Lampe a splica den un conferencia di prensa di e partido riba Plasa Padu Lampe.
Den e reunion aki a dicidi cu lo haci cambio den statuut. Na 2010 tabatin e prome cambio den statuut ora cu a perde eleccion, y a dicidi di kita e parti cu ta papia di candidatonan riba lista no ta ministeriabel. Asina por ehempel por tin mas consistencia den atraccion di candidatonan. Di e forma aki su persona por a bira minister.
Na 2020 a dicidi di haci otro cambio, kitando un prohibicon. Tabata prohibi cu un parlamentario of minister por ta miembro di directiva. Despues di e experencia di ultimo añanan,a dicidi cu ta importante pa tin un dialogo continuo y harmonia entre esnan representando RED den parlamento, den conseho di minister y den e directiva di Partido RED.
Asina a eligi un directiva nobo cu lo guia nan den e aña electoral. Kinsasha van der Bliek a bira presidente di e partido, secretario ta Thomas Ruiz (presidente saliente), tesorero Stefano Croes y comisarionan ta Ricardo Croes y Armando Lampe.
Cambio di statuut no ta cambio di principionan di e partido.
RED semper a traha den forma innovativo y p’esey e votegetter di partido mester ta den Parlamento.
Van der Bliek a splica cu nan kier kibra e custumber di e politica tradicional y ta concentra riba innovacion pa Aruba.
